TÚRKSOI-da Ázerbaıjan demokratııalyq respýblıkasynyń 100 jyldyǵy toılandy

ASTANA. QazAqparat - Ankarada Halyqaralyq túrik mádenıeti uıymynyń shtab-páterinde Ázerbaıjan Respýblıkasynyń qurylǵanyna 100 jyl tolýyna oraı, arnaıy baǵdarlama uıymdastyryldy. Bul týraly «QazAqparat» HAA TÚRKSOI uıymynyń baspasóz qyzmetine silteme jasap habarlaıdy.

Sharaǵa Túrik Respýblıkasy prezıdentiniń bas keńesshisi ıAlchyn Topchý, Ázerbaıjannyń Túrkııadaǵy elshisi Hazar Ibragım, TÚRKSOI bas hatshysynyń orynbasary, professor Fyrat Pýrtash, «2018 qozǵalysynyń» Túrkııadaǵy ókili Saıde Ekmen, jazýshy jáne jýrnalıst doktor Elnýr Nıftalıev, sonymen qatar Ázerbaıjannyń Qarýly Kúshteri men buqaralyq aqparat quraldarynyń ókilderi qatysty.

Fyrat Pýrtash óziniń kirispe sózinde Ázerbaıjan Demokratııalyq Respýblıkasynyń 100 jyldyǵyna arnalǵan sharany uıymdastyrýshy retinde halyq aldyna shyǵyp sóz sóıleýdiń ózi úshin úlken mártebe ekendigin aıtty. Sonymen qatar ol osydan 100 jyl buryn Ázerbaıjannyń negizin qalaǵan uly tulǵalar, ıntelegentsııa ókilderin eske alýdyń ózi maqtanysh ekendigin jetkizdi.

Baǵdarlama aıasynda  ázerbaıjannyń belgili jýrnalıst-jazýshysy, «2018 qozǵalysy» uıymynyń quryltaıshylarynyń biri, ǵylym doktory, dotsent Elnýr Nıftalıevtiń «Azerbaycan Siyasi Jurnalistikanın Teşekkülü ve İnkşafı (1900-1920-ci İller)» (Ázerbaıjandaǵy saıası jýrnalıstıkanyń qalyptasýy men damýy (1990-1920 j.) kitabynyń tusaýy kesildi.

Nıftalıev sózinde ıdeıalar evolıýtsııasy, Ázerbaıjan respýblıkasynyń negizin qalaýshy ult zııatkerleriniń erkin memleket qurý ıdeıasy sııaqty máseleler tóńireginde sóz qozǵady.

Shara barysynda sonymen qatar, ázerbaıjannyń jas ıntelegentsııasynyń ókili Týran Gafarly sóz sóıledi. Ol Ázerbaıjannyń ult-azatttyq kúres tarıhyna qatysty zertteýlerine qysqasha sholý jasady.