TÚRKSOI aıasynda Ahmet Baıtursynulynyń mereıtoıyna arnalǵan konferentsııa ótti

YSTAMBUL. QazAqparat - Búgin TÚRKSOI aıasynda Ystambul qalasynda (Túrkııa) Ahmet Baıtursynulynyń 150 jyldyq mereıtoıyna arnalǵan «Ahmet Baıtursynuly jáne túrki órkenıeti» atty ǵylymı konferentsııa ótti, dep habarlaıdy QazAqparat.

Sharany Prezıdent Qasym-Jomat Toqaevtyń tapsyrmasymen QR Ǵylym jáne joǵary bilim mınıstrligi uıymdastyrdy.

Konferentsııaǵa TÚRKSOI Bas hatshysy Sultan Raev, Halyqaralyq Túrki akademııasy prezıdentiniń mindetin atqarýshy Majıdlı Fızýlı, QR Túrkııa Respýblıkasyndaǵy Tótenshe jáne Ókiletti Elshisi Erkebulan Sápıev, QR Ystanbuldaǵy Bas konsýly Álim Baıel, Ystambul ýnıversıtetiniń rektory Mahmýt Ak, Ahmet Baıtursynulynyń 150-jyldyǵyna Qazaqstan – Túrkııa baǵytynda velosherý arnaǵan aýdarmashy, jýrnalıst Ernat Melsuly qatysyp, quttyqtaý sóz sóıledi. Otandyq jáne Túrkııa, Ázerbaıjan, Ózbekstan, Qyrǵyzstannan alashtanýshy, ahmettanýshy ǵalymdar baıandama jasady.

«Ahmet Baıtursynuly – túrki halyqtaryna ortaq uly tulǵa. Onyń ilimi halyqaralyq ǵylymı keńistikte, ásirese, túrki álemindegi gýmanıtarlyq ǵylymdarda reformatorlyq ıdeıalarymen erekshelenedi», – dep atap ótti QR Ǵylym jáne joǵary bilim vıtse-mınıstri Talǵat Eshenqulov.

Konferentsııa aıasynda Ahmet Baıtursynulynyń eńbekterin tanytýǵa arnalǵan kitap kórmesi, ult ustazynyń ómiri men qyzmetine arnalǵan fotokórme uıymdastyrylyp, «Qazaq órkenıeti jáne Ahmet Baıtursynuly» taqyrybynda beınerolık kórsetildi.

Sonymen qatar «Ahmet Baıtursynuly. Tańdamaly shyǵarmalary» (qazaq, túrik, aǵylshyn, orys tilderinde) kitabynyń jáne Halyqaralyq Túrki akademııasy tarapynan usynylǵan Raıhan Imahanbettiń «Ǵasyr sańlaǵy» kitabynyń tusaýkeseri ótti.

Foto: t.me/gylym_jogary_bilim