TúrkPA mıssııasynyń referendýmdaǵy baıqaýshylary Qazaqstanǵa keldi

NUR-SULTAN. QazAqparat - QR Parlamenti Senaty tóraǵasynyń orynbasary Asqar Shákirov respýblıkalyq referendýmda baıqaýshy bolatyn Túrkitildes elder Parlamenttik Assambleıasy mıssııasynyń ókilderimen kezdesti. QazAqparat bul týraly Senat saıtyna silteme jasap habarlaıdy.

Kezdesýge Túrkitildes elderdiń Parlamenttik Assambleıasynan Túrkııa Uly Ulttyq Jınalysynyń depýtaty Rejep Sheker, Qyrǵyz Respýblıkasy Jogorký Keneshiniń depýtaty Cholpon Sultanbekova, Ázerbaıjan Respýblıkasy Mıllı Májilisiniń depýtaty Hıkmet Mammadov, TúrkPA Bas hatshysy Mehmet Sýreıa Er qatysty.

Onyń barysynda TúrkPA-nyń qurylýy men damýyna óz úlesin qosqan el retinde Qazaqstan osy uıym aıasyndaǵy parlamentaralyq yntymaqtastyqqa zor mańyz beretini atap ótildi.

Memleket basshysynyń bastamasymen qolǵa alynǵan konstıtýtsııalyq reformanyń negizgi máseleleri, sondaı-aq ony jalpy respýblıkalyq referendýmǵa shyǵarýdyń mańyzy týraly halyqaralyq baıqaýshylar jan-jaqty habardar etilgen.

«Qazirgi Konstıtýtsııaǵa engiziletin, Qazaqstannyń barlyq azamattaryna ádildik pen teń quqyǵyn qalpyna keltirýdi, tejemeli jáne tepe-teńdik júıesin bılikte ornyqtyrý mindetin kózdeıtin erejeler «Jańa Qazaqstandy» qurýdy iske asyrýǵa baǵyttalǵan. Bul demokratııany damytýǵa jáne basqarýdyń sýperprezıdenttik túrinen arylý úshin mańyzdy ári qajetti shart», - dedi palata tóraǵasynyń orynbasary.

Aldaǵy referendýmda Konstıtýtsııaǵa engiziletin ózgerister Qazaqstan halqynyń talaptary men usynystaryna negizdelgeni atap ótildi.