TúrkPA baıqaýshysy: Qazaqstandaǵy prezıdent saılaýy halyqaralyq standarttarǵa saı ótti
«Saılaýdyń halyqaralyq standarttar men qujattarǵa sáıkes ótkizilgenin kórdik. 2022 jyly 5 maýsymda referendým ótti. QR Konstıtýtsııasynyń 33-babyna ózgerister engizildi. Sodan keıin referendýmnyń nátıjeleri jarııalandy. Sondaǵy ózgeris boıynsha, Qazaqstanda prezıdent 7 jylǵa saılanady. Bizdiń delegatsııa 17 qarashada prezıdenttiń kezekten tys saılaýyn baqylaý jumysyn bastady. Saılaýdy baqylaý baǵdarlamasy aıasynda QR OSK tóraǵasy Nurlan Ábdirov, QR Parlamenti Senatynyń tóraǵasy Máýlen Áshimbaev, Májilis spıkeri Erlan Qoshanov halyqaralyq baıqaýshylarmen kezdesýler ótkizdi. Osy kezdesýler barysynda biz saılaýǵa daıyndyqty baqylap, saılaý týraly aqparat aldyq, prezıdenttikke kandıdattarmen áńgime qurýǵa múmkindik aldyq. Biz kandıdattardyń josparymen, olardyń saılaýaldy baǵdarlamasymen tanystyq, saılaý naýqanynyń jumysy týraly aqparat aldyq», - dedi TúrkPA baıqaýshysy.
Uıym atynan qatysqan delegatsııa 20 qarashada Almaty men Astananyń birneshe saılaý ýchaskesinde bolǵan.
«Biz protsesti saılaý ýchaskeleri ashylǵannan bastap daýys sanaý bastalǵanǵa deıin baqyladyq. Saılaý kezinde bári tynysh ótti. Biz prezıdentti saılaý barysyna oń baǵa beremiz. Bizdiń delegatsııa saılaýdyń joǵary, kásibı deńgeıde ótkenin baqylap, kóz jetkizdi. Biz búkil organdardyń saılaýǵa daıyn bolǵanyn kórdik. Sondaı-aq, múmkindigi shekteýli jandarǵa barlyq jaǵdaı jasaldy, oń baǵa beremiz. OSK dereginshe, saılaýshylardyń qatysý deńgeıi 69,43% boldy. Qasym-Jomart Toqaev saılaýshylardyń 81,31 paıyzynyń daýsyn jınap, jeńiske jetti. Biz saılaýdyń ulttyq zańnamaǵa jáne saılaýdy ótkizýdiń halyqaralyq standarttaryna sáıkes ótkenin rastaımyz», - dedi Erbol Kaıa.
Aıta keteıik, Ortalyq saılaý komıssııasy prezıdent saılaýynyń aldyn ala nátıjesin jarııalaǵan bolatyn.