Túrikmenstan Prezıdenti Serdar Berdimuhamedov Astanaǵa keldi

<p>ASTANA. KAZINFORM &ndash;<em> </em>Túrikmenstan Prezıdenti Serdar Berdimuhamedov Ortalyq Azııa memleketteri basshylarynyń VI konsýltatıvtik kezdesýine qatysady. Túrikmenstan basshysyn Qazaqstan Premer-Mınıstri Oljas Bektenov qarsy aldy. Bul týraly Úkimettiń baspasóz qyzmeti habarlady.</p>

Qazaqstan men Túrikmenstan ózara is-qımyldyń barlyq spektri boıynsha saýda-ekonomıkalyq yntymaqtastyqty belsendi túrde keńeıtýde. Máselen, 5 jyl ishinde eki el arasyndaǵy ózara saýda kólemi 4 esege ósip, tek sońǵy jyldyń ózinde 28%-ǵa artty.

Bıylǵy 6 aıda taýar aınalymy $237,2 mln boldy. Búgingi tańda yntymaqtastyqty arttyrýdyń perspektıvaly baǵyttary – gaz jáne tranzıttik-kólik salalary. Onda avtojoldardy rekonstrýktsııalaý jáne salý boıynsha birqatar iri jobalar iske asyrylyp jatyr.

Onyń ishinde uzyndyǵy 225 shaqyrym bolatyn «Qazaqstan shekarasy – Garabogaz – Túrikmenbashy» jańa avtojolynyń jáne Garabogazgol shyǵanaǵy arqyly ótetin jańa kópirdiń qurylysy bar. Uzyndyǵy 165 shaqyrym «Jańaózen – Túrikmenstan shekarasy» ýchaskesin rekonstrýktsııalaý jobasy pysyqtalýda.