Túrikmenstan ekonomıkasyna ınvestıtsııa salýǵa daıynbyz – Murat Nurtileý
«Qazaqstan men Túrikmenstan arasyndaǵy yntymaqtastyqqa keletin bolsaq, bıylǵy jyl kóptegen aýqymdy is-sharaǵa toly. Osy tusta, ózara bıik jáne joǵary deńgeıdegi saparlarǵa, memleket basshylarynyń kópjaqty formattaǵy kezdesýlerine erekshe nazar aýdaryldy. Aldaǵy is-sharalardy sapaly ári mazmundy qamtamasyz etý jóninde keshendi jumys júrgizýge ýaǵdalastyq. Ekonomıkalyq yntymaqtastyqty odan ári tereńdetý joldary qarastyrylyp, saýda, ónerkásip, energetıka, kólik jáne logıstıka salalaryndaǵy ózara múddelik tanytylyp otyrǵan birqatar máseleler kóterildi», - dedi Murat Nurtileý.
Onyń dereginshe, sońǵy bes jylda ekijaqty saýda shamamen tórt ese ulǵaıdy. Ótken jyldyń qorytyndysynda taýar aınalymy 28 paıyzǵa ósip, 563 mln dollarǵa jetti. Osy jyldyń birinshi toqsanynda eki el arasyndaǵy saýda kólemi 100 mln dollardan asty.
«Oryn alyp jatqan pozıtıvti úrdister ózara saýdamyzdy 1 mlrd dollarǵa deıin jetkizý jónindegi memleket basshylarynyń tapsyrmasyn jaqyn bolashaqta oryndaýǵa úlken senim uıalatady. Bul turǵyda, ekijaqty taýar aınalymynyń nomenklatýrasyn keńeıtýge, óńiraralyq yntymaqtastyq pen iskerlik baılanystardy damytýǵa nazar aýdaryldy. Oǵan qosa, saýda aınalymyn ulǵaıtý boıynsha jumys toby qyzmet atqarýda. Aýyl sharýashylyǵy salasynda da jaǵymdy ózgerister baıqalady. Byltyr agrarlyq ónim aınalymy 20%-ǵa ósken. Aımaqtaǵy azyq-túlik qaýipsizdigin nyǵaıtýǵa ortaq kúsh-jiger salý qajettiligi de taraptarymyzdyń qoldaýyn taýyp otyr. Túrikmen baýrlarymyzdy Azyq-túlik qaýipsizdigi jónindegi Islam uıymyna qosylýǵa shaqyrdym. Investıtsııalyq yntymaqtastyǵymyz da belsendi túrde damyp keledi», - dedi ol.
Onyń atap ótýinshe, elimizde tirkelgen 100-den astam túrikmen kompanııasy ekijaqty kooperatsııaǵa qomaqty úles qosyp otyr.
«Óz kezeginde, Túrikmenstannyń ekonomıkasyna ınvestıtsııalar salýǵa daıynbyz. Osy tusta, Investıtsııalardy kótermeleý jáne ózara qorǵaý týraly kelisimge qol qoıý mańyzdy», - dedi vıtse-premer.