Túrkııanyń tórt provıntsııasy jer silkinisinen zardap shekti

ANKARA. QazAqparat - Túrkııanyń shyǵysy men ortalyq bóliginde, Malatııa, Bıngel, Sıvas jáne Konııa provıntsııalarynda jer silkinisi tirkeldi, dep habarlaıdy QazAqparat Anadolu agenttigine silteme jasap.

Malatııada 4,7 baldyq jer silkinisi boldy. Tótenshe jaǵdaılar basqarmasynyń (AFAD) saıtynda jarııalanǵan aqparatqa sáıkes, 23:25-te epıtsentri Pytýrge aýdanynda, 7 shaqyrym tereńdikte jer silkinisi tirkeldi.

Jergilikti ýaqyt boıynsha saǵat 03:28-de Bıngólde Solhan aımaǵynda, 14 shaqyrym tereńdikte, magnıtýdasy 4,4 bolatyn jer silkinisi tirkeldi.

Túrkııanyń shyǵysyndaǵy Sıvas provıntsııasynda magnıtýdasy 4,7 baldyq jer silkinisi boldy. Jerasty dúmpýleri juma kúni jergilikti ýaqyt boıynsha 20:19-da tirkelgen. Jer silkinisiniń oshaǵy 5 km tereńdikte, epıtsentri Gıýrıýn oblysynda bolǵan.

6 aqpanda epıtsentri Kahramanmarashta bolǵan jer silkinisinen keıin Gıýrıýn apat aımaǵyna qosyldy. Tabıǵat apaty saldarynan oblysta 217 ǵımarat qırady nemese aıtarlyqtaı zardap shekti. 933 ǵımarat jeńil zaqymdanǵan.

Túrkııanyń ortalyǵyndaǵy Konıa provıntsııasynda magnıtýdasy 4,3 baldyq jer silkinisi boldy. Jerasty dúmpýleri juma kúni jergilikti ýaqyt boıynsha 17:01 tirkeldi. Jer silkinisiniń oshaǵy 7 shaqyrym tereńdikte bolǵan. Jer silkinisiniń oshaǵy Eregli aımaǵynda boldy.