Túrkııanyń tórinde «Qazaq-túrik baýyrlastyǵy» eskertkishi ornatyldy

ASTANA. QazAqparat – Túrkııanyń Ystambul qalasyndaǵy Baǵjylar aýdanynda «Qazaq-túrik baýyrlastyǵy» eskertkishi saltanatty túrde ashyldy, dep habarlaıdy QazAqparat «Otandastar qoryna» silteme jasap.

Altaıdan Anadolyǵa qonys aýdarǵan qazaqtardyń Túrkııa memleketin mekendeýine 70 jyl tolýy qarsańynda boı kótergen bul eskertkish – eki el arasyndaǵy týystyq, dostyq qarym-qatynastyń aıryqsha belgisi. Avtory – Qazaqstannyń Eńbek sińirgen qaıratkeri, QR Kórkemsýret Akademııasynyń birinshi vıtse-prezıdenti, belgili sýretshi, rejısser, telejýrnalıst Januzaq Músápir.

Іs-sharany Qazaqstannyń Respýblıkasynyń Túrkııadaǵy Tótenshe jáne Ókiletti Elshisi Erkebulan Sápıev saltanatty túrde ashyp berdi.

Baǵjylar aýdanynyń meri Abdýlla Ozdemır myrza Túrkııada turyp jatqan qazaq ultyna óz rızashylyǵyn bildirip, quttyqtaýyn jetkizdi.

Qazaqstan Respýblıkasy Parlamenti Senatynyń depýtaty, Halyqaralyq qatynastar, qorǵanys jáne qaýipsizdik komıtetiniń múshesi Murat Baqtııaruly sóz sóılep, qazaq ultynyń qıly tarıhyna toqtalyp, túrik halqynyń baýyrlastyǵyn tilge tıek etti.

«Birlik» qazaq jastary uıymynyń tóraǵasy Aslan Serik qazaqtyń qara dombyrasymen «Qazaq osy» ánin oryndap, jınalǵan qaýymnyń yqylasyna bólendi.

«Otandastar qory» KeAQ Prezıdenti Abzal Saparbekuly Qazaqstan men Túrkııanyń araqatynasyna toqtalyp, birligi bekem memleketter ekenin aıtyp ótti. Sonymen qatar, Baǵjylar aýdanynyń ákimine shapan jaýyp, arnaıy syılyq tabystady.

Shara aıasynda qazaq kóshiniń 70 jyldyǵyna oraı, «ULY KÓSh» taqyrybynda fotosýretter men QR joǵary oqý oryndarynyń bilim kórmesi uıymdastyryldy.