Túrkııanyń Nıgde provıntsııasynda jer silkindi

ASTANA. QazAqparat – Túrkııanyń Nıgde provıntsııasynda 5,3 baldyq jer silkinisi tirkeldi. Jer asty dúmpýleriniń epıtsentri Bor aýdanynda ornalasqan, dep habarlaıdy QazAqparat «Anadoly» agenttigine silteme jasap.

«Senbi, 25 aqpanda jergilikti ýaqyt boıynsha 13:27-de Túrkııa provıntsııasynda 5,3 baldyq jer silkinisi boldy. Túrkııa úkimeti janyndaǵy tótenshe jaǵdaılardyń aldyn alý jáne joıý basqarmasy (AFAD) jer asty dúmpýleriniń epıtsentri Bor aýdanynda ornalasqanyn habarlady. Jer silkinisi oshaǵy 7 km tereńdikte ornalasqan», - dep jazylǵan Anadolý saıtynda.

Aıta keteıik, búgin Túrkııanyń shyǵysy men ortalyq bóliginde, Malatııa, Bıngel, Sıvas jáne Konııa provıntsııalarynda jer silkinisi tirkeldi.

Túrkııanyń Tabıǵı apattardy basqarý jáne tótenshe jaǵdaılar agenttigi (AFAD) epıtsentri Kahramanmarashta bolǵan jer silkinisi saldarynan 44 218 adam qaza tapqanyn habarlady.