Túrkııanyń Malatııa óńirinde bir mınýtta eki márte jer silkindi

MALATIıA. QazAqparat - Túrkııanyń Malatııa aımaǵynda birinen soń biri eki jer silkinisi boldy, dep habarlaıdy QazAqparat TRT Haber agenttigine silteme jasap.

Apattar men tótenshe jaǵdaılardy basqarý mınıstrliginiń (AFAD) saıtyndaǵy aqparatqa qaraǵanda Malatııanyń Ieshılıýrt aýdanynda búgin, 12 tamyz saǵat 16.39-da 4,8 baldyq jer silkinisi tirkelgen.

Jerasty dúmpýi bolǵan tereńdik - 6,35 shaqyrym.

Alǵashqy dúmpýden keıin shamamen bir mınýt ótkende Ieshılıýrt aýdanynda jer silkinisi taǵy qaıtalandy. Bul jolǵy qýaty - 4,5 ball.

Ekinshi zilzala 7 shaqyrymdaı tereńde bolǵan.

Anadoly agenttiginiń habarlaýynsha, jer silkine sala keı turǵyndar úıinen jáne jumys ǵımaratynan kóshege shyqqan.

Olar áli de ashyq alańda apattyń aqyryn kútip otyr.

Jer silkinisi Malatııamen kórshiles Adyıaman, Shanlyýrfa, Gazıantep jáne Kahramanmarash sııaqty provıntsııalarda da sezilgen.

Gýbernator Hýlýsı Shahın jaǵdaıdy túsindirip, eshkim zardap shekpegenin málimdedi.

«Eshqandaı keleńsiz jaǵdaı bolǵan joq. Ǵımarattar qulamady. Tek qatty qoryqqanyn aıtyp shaǵymdanǵan birdi-ekili adamdar boldy. Qazirgi ýaqytta dalada tekserý jalǵasyp jatyr. Ázirge jaman habar joq. Artyn kútemiz», - dedi ol.

Eske sala keteıik, keshe de Túrkııanyń shyǵysyndaǵy osy Malatııa provıntsııasynda 5,3 baldyq jer silkinisi bolǵan edi.