Túrkııanyń Kahramanmarash provıntsııasynda jer silkindi
Túrkııa úkimeti janyndaǵy Tótenshe jaǵdaılardyń aldyn alý jáne saldaryn joıý basqarmasynyń aqparatynsha, jerasty dúmpýi jergilikti ýaqytpen 08:45-te tirkelgen.
Epıtsentri Onıkıshýbat aýdanynda ornalasqan. Oshaǵy 6,94 shaqyrym tereńde jatyr. Zardap shekkender men qıraǵan ǵımarattar týraly aqparat túsken joq.
Eske salaıyq, 6 aqpanda Túrkııanyń Kahramanmarash provıntsııasynda qýaty 7 baldan asatyn eki jer silkinisi boldy. Terbelis eldiń 10 provıntsııasynda, sondaı-aq kórshiles memleketterde, sonyń ishinde Sırııada sezildi.
Aqpan aıynda bolǵan tabıǵı apattan Túrkııaǵa kelgen shyǵyn 105 mlrd dollardan asty.
Sońǵy resmı derekterge sáıkes, tabıǵı apat 50 096 adamnyń ómirin qıdy. 107 204 adam zardap shekti.
Seısmıkalyq belsendilik Orta Azııada baıqalyp jatyr.
21 naýryzda Kahramanmarashta 4,1 magnıtýdasymen jer silkindi.
Sondaı-aq búgin túnde Taraz, Shymkent jáne Túrkistan turǵyndary 2-3 ball qýatymen jerasty dúmpýin sezindi. Jer silkinisiniń oshaǵy Almaty qalasynan ońtústik-batysqa qaraı 740 km qashyqtyqta Tájikstan aýmaǵynda ornalasty. Sondaı-aq terbelis Ózbekstannyń birqatar qalasyna jetti.
Tańǵy saǵat 06.27-de Qazaqstan seısmologtary Tájikstandaǵy jer silkinisin tirkedi.
Saǵat 07.53-te Tájikstan men Qyrǵyzstan shekarasynda jerasty qozǵalysy taǵy sezildi.
Qazaqstandyq seısmologtar saǵat 08.53-te de tájik elindegi zilzalany tirkedi.
Eske salaıyq, Qazaqstannyń 5 óńir turǵyndary jerasty dúmpýin 21 naýryz kúni de sezingen bolatyn. Zilzala oshaǵy Aýǵanstanda ornalasty. Aýǵan elindegi terbelis Pákistanǵa da jetti. Saldarynan kem degende 11 adam qaza bolǵany týraly buǵan deıin jazǵan edik.