Túrkııanyń Hataı provıntsııasynda bolǵan jer silkinisinen zardap shekkender 562 adamǵa jetti

ANKARA. QazAqparat - 20 aqpanda epıtsentri Túrkııanyń Hataı provıntsııasynyń Defne aýdanynda bolǵan 6,4 baldyq jer silkinisinen 6 adam qaza taýyp, 562 turǵyn zardap shekti. Bul týraly Hataıdaǵy Úılestirý ortalyǵynda ótken brıfıngte Túrkııanyń ishki ister mınıstri Súleıman Soılý aıtty, dep habarlaıdy QazAqparat Anadoly agenttigine silteme jasap.

Onyń málimetinshe, zardap shekkenderdiń 18-iniń jaǵdaıy tym aýyr.

Vedomstvo basshysy qazirgi ýaqytta Hataıda qulaǵan bes ǵımaratta izdestirý-qutqarý jumystary áli jalǵasyp jatqanyn jetkizdi.

Mınıstr azamattardy búlingen ǵımarattar men qurylystarǵa kirýge salynǵan tyıymdy qatań saqtaýǵa shaqyrdy.

Buǵan deıin Túrkııanyń densaýlyq saqtaý mınıstri Fahreddın Qoja Túrkııanyń Hataı provıntsııasynda dúısenbi kúni keshke bolǵan jer silkinisinen 294 adamnyń zardap shekkenin habarlady.

Túrkııanyń ońtústigindegi Hataı provıntsııasynyń Defne aımaǵynda 20 aqpan kúni keshke bolǵan 6,4 baldyq jer silkinisinen keıin aımaqta 90 jerasty dúmpýleri tirkeldi, onyń eń joǵarǵy magnıtýdasy 5,8-ge jetti.

Sondaı-aq BAQ Sırııadaǵy jer silkinisiniń bes qurbany týraly habarlady.

6 aqpanda epıtsentri Túrkııanyń Kahramanmarash provıntsııasynyń Pazardjık aýdanynda bolǵan jer silkinisiniń qurbandary 41 myńnan asty.

Foto: aa.com.tr