Túrkııanyń Bodrým qalasy mańynda ormannan órt shyqty
20:00, 12 Shilde 2023
ASTANA. QazAqparat - Túrkııanyń Muǵla aımaǵynda orman órtenip jatyr, dep habarlaıdy QazAqparat Anadoly agenttigine silteme jasap.
Muǵla óńirlik orman sharýashylyǵy basqarmasy mamandary men órt sóndirýshiler dereý oqıǵa ornyna jóneltilgen.
Olar Muǵlanyń Mılas aýdanynda orman alqabynda tutanǵan órtti áýeden jáne qurlyqtan sóndirýge kúsh salady.
Órttiń neden shyqqany ázirge belgisiz.
«Dál qazir eń bastysy - qyzyl jalyndy áýe jáne jer arqyly tezirek baqylaýǵa alý» dep habarlady TRT Haber.
Telearna tilshisi Jıhat Sónmez ottyń Mılas pen Bodrým arasyndaǵy Gúverchınlık aýdanyndaǵy ormanda jalyndap jatqanyn, ony sóndirýge kúshti jel kedergi jasap otyrǵandyqtan tilsiz jaýdyń odan ári kúsheıe túsýi múmkin ekenin jetkizdi.
Onyń aıtýynsha, oqıǵa ornyna jaqyn mańda eldimekender bar.
Mılas aımaǵynan bastalyp, jeldiń áserimen Bodrýmǵa qaraı ilgerilegen orman órtin sóndirýge 8 ushaq pen 14 tikushaq, 74 sý tankeri, 12 tehnıka jáne 615 órt sóndirýshi jumyldyrylǵan.