Túrkııanyń barlyq aýmaǵynda memlekettik týlar jartylaı túsirildi

ANKARA. QazAqparat - Túrkııa eldiń ońtústiginde bolǵan joıqyn jer silkinisi saldarynan kóptegen adam qazasyna baılanysty aza tutý kúnderin bastady, dep habarlaıdy QazAqparat Anadolu agenttigine silteme jasap.

Túrkııanyń memlekettik týlary búkil el aýmaǵynda jartylaı túsirildi.

Buǵan deıin prezıdent Rejep Taıyp Erdoǵan tabıǵı apat qurbandaryna baılanysty Túrkııada jeti kúndik ulttyq aza tutý jarııalaǵan bolatyn.

Memleket basshysy qaraly kúnniń jarııalanýyna baılanysty Túrkııanyń búkil aýmaǵynda jáne eldiń sheteldegi ókildikterinde jeksenbi, 12 aqpan kúni kún batqanǵa deıin memlekettik týlar jartylaı túsiriletinin aıtty.

Túrkııanyń ońtústiginde bolǵan joıqyn jer silkinisinen qaza tapqandar sany 1762-ge jetti. Bul týraly Túrkııanyń Tótenshe jaǵdaılardyń aldyn alý jáne zardaptaryn joıý mınıstrligi(AFAD) habarlady.

Vedomstvonyń málimetinshe, taǵy 12 068 adam jaraqat alǵan.

AFAD málimetinshe, Túrkııanyń ońtústik-shyǵysynda keshe jeti baldan asatyn eki jer silkinisi boldy (jergilikti ýaqyt boıynsha 04.17-de – 7,7 ball jáne 13,24-te – 7,6 ball).

Túrkııa bıligi turǵyndardy jer silkinisinen qorqyp, úılerine qaıtpaýǵa shaqyrdy.