«Túrkııany ne túlen túrtti?» - BAQ-qa sholý
***
Keshe elimiz Parlamentinde «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta mańyzdy máseleler qaraldy. Parlamenttik tyńdaý deńgeıinde ótkizilgen bul máseleni talqylaýǵa eki palatanyń da depýtattary, Prezıdent Ákimshiligi men Úkimettiń jaýapty qyzmetkerleri, oblys ákimderiniń orynbasarlary, agrarshy ǵalymdar, salanyń bilikti mamandary, sheteldik sarapshylar qatysty. Osy jıyn arqaý bolǵan maqala «Egemen Qazaqstan» gazetiniń senbilik sanynda «Ata kásiptiń abyroıy qaıtse artady?» degen taqyryppen berilgen. Basylymnyń jazýynsha, parlamenttik tyńdaýda mal sharýashylyǵy salasynda júrip jatqan ózgerister, mundaǵy ózekti máseleler men perspektıvalarǵa qatysty negizgi baıandamany Aýyl sharýashylyǵy mınıstri Asyljan Mamytbekov jasady. Onyń aıtýynsha, Qazaqstan qazirgi kúni qus etinen basqa et túrlerimen ózin tolyq qamtamasyz etip otyr. Tek ótken jyldyń ózinde ǵana sıyr etin óndirý kórsetkishi 373,5 myń tonnany, qoı etin óndirý 153,8 myń tonnany, shoshqa etin óndirý 192,7 myń tonnany, jylqy etin óndirý 85,1 myń tonnany, qus etin óndirý 123,1 myń tonnany, sút óndirý 4 mıllıon 851,6 myń tonnany qurady. Sóıtip, 2012 jyldyń qorytyndysynda mal sharýashylyǵy ónimderin óndirý kórsetkishi 1 trıllıon teńgeden asyp tústi. Jáne elimizde alǵash ret ósimdik sharýashylyǵyna qaraǵanda kóbirek ónim óndirildi.
***
«Keshe, qasıetti juma kúni «Astana Opera» óz tarıhyndaǵy birinshi teatrlyq maýsymyn ashty. Oǵan el Prezıdenti Nursultan Nazarbaev qatysty», - dep jazady «Aıqyn» gazeti «Astana Opera» álemdegi alyp teatrdyń qataryna enbek» degen taqyryptaǵy maqalasynda. Basylymnyń atap ótýinshe, Mádenıet jáne aqparat mınıstri Muhtar Qul-Muhammed Astanada osyndaı tamasha teatrdy turǵyzýdaǵy maqsat - «opera men balet sııaqty elıtaly ónerdi qazaqstandyqtardyń rýhanı ómiriniń bir bóligine aınaldyrý, el turǵyndarynda mýzykalyq talǵam men joǵarǵy estetıkalyq qajettilikter qalyptastyrý, otandyq ónerdi álemdik mádenı úderiske tabysty kiriktirý» ekendigin atap ótti. «Astana Opera» álemdegi alyp teatrlardyń qataryna kirmek. Salystyrý úshin: HHІ ǵasyrda búkil Eýropada jańadan qoldanysqa berilgen eki teatrdyń biri - Kopengagen teatrynyń aýdany 41 myń sharshy metrdi quraıdy. Al qazaq eliniń bas qalasyndaǵy jańa opera jáne balet teatry ǵımaratynyń aýdany 64 myń sharshy metrdi alyp jatyr!
Osy basylymnyń jazýynsha, Túrkııanyń dúrligip jatqanyna jıyrma kúnnen asty. Ázirge toqtala qoıatyn sıqy joq. Daýdyń basy kishkentaı ǵana saıabaq - Gezıden bastalǵanymen, ózeginde ózge dúnıe jatyr. Muny birneshe faktorǵa bólip qaraýǵa bolatyn sııaqty. «Birinshi, munda turyp jatqan ulttardyń ala-qulalyǵy. Jetpis úsh mıllıonǵa jýyq halyqtyń barlyǵy taza túrik emestigi. 2000-2002 jyly Batys elderi júrgizgen saýalnamaǵa jergilikti jurttyń 36 paıyzy ǵana «etnıkalyq túrikpiz» (degenmen, resmı bılik eldegi turǵyndardyń 82 paıyzy túrik degendi keltiredi) dep jaýap bergen. Qalǵany... Muny da dúmpýge áser etetin faktordyń biri retinde qaraýǵa bolady. Ekinshisi, memlekettik basqarylym qandaı bolýy (zaıyrly nemese ıslamdy tý etken) kerek degen daý. Úshinshisi - kúrt máselesi. Kúrtter Shyǵys Anadolydan avtonomııa qurýdy qalaıdy. Árıne, búginde sany 20 mıllıonǵa jetip otyrǵan kúrtter asa iri kúsh. Tórtinshisi - armıan máselesi. Al bulardyń báriniń kóńilin tabý qazirgi bılikke ońaı emes. Buǵan keńes eli qulaǵan soń AQSh-tyń Túrkııaǵa kózqarasy da sál ózgergenin qosýǵa bolady», - dep jazady basylym. Maqala «Túrkııany ne túlen túrtti?» degen taqyryppen berilgen.
«Qazaqstan Prezıdenti Nursultan Nazarbaevtyń atyna Amerıka Qurama Shtattarynyń Prezıdenti Barak Obamadan hat keldi», - dep jazady «Kazahstanskaıa pravda» gazeti. Basylymnyń jazýyna qaraǵanda, óz hatynda B.Obama Qazaqstan táýelsizdigin alǵan kezden bastap eki el arasyndaǵy qarym-qatynastardyń serpindi damýyna qatysty Nursultan Nazarbaevtyń oń baǵasyna qosylatynyn atap ótken.
«AQSh pen Qazaqstan arasyndaǵy Strategııalyq seriktestik týraly únqatysý qazirgi zamanǵy syn-qaterlerdi eńserýde ortaq kózqaras pen ustanymnyń dáleli bolyp tabylady. Men Qazaqstanǵa Aýǵanstandaǵy jaǵdaıdy turaqtandyrý isindegi berik ustanymy úshin rızashylyǵymdy bildiremin. Sizderdiń elderińizdiń kómegi aýǵandyqtar ómirin jaqsartýǵa jáne osy eldegi qaýipsizdikti nyǵaıtý jónindegi halyqaralyq kúshterdiń tıimdiligine oń yqpal etedi», - delingen hatta.