Túrkııalyq kásipker Qazaqstanǵa medıtsınalyq qural-jabdyqtar joldady

NUR-SULTAN. QazAqparat - Túrkııalyq kásipker Hýseıın Arslan qazaq eline medıtsınalyq qural-jabdyqtar joldady, dep habarlaıdy QazAqparat «Habar 24» telearnasyna silteme jasap.

Jarty tonnalyq júktiń ishinde resmı mekemelerde qoldanylatyn jabdyqtar, 1000 dana betperde, medıtsınalyq qolǵaptar, kombınezondar, vakýýmdyq kózildirikter jáne 100 dana termometr syndy zattar bar. Atalmysh jabdyqtar elimizdiń densaýlyq saqtaý salasy men arnaıy mekemelerde qoldanylatyn bolady.

Júk tıelgen ushaq Nur-Sultan qalasyna qondy. Qıyn kúnde qol ushyn sozǵan túrik baýyrlarymyzdyń atalmysh kómegi elimizdiń koronavırýspen kúresine tyń serpin beredi. Aıta ketken jón, atalmysh baýyrlastyq kómek QR Syrtqy ister mınıstrligi men Air Astana áýe kompanııasynyń qoldaýymen Ankaradan jóneltildi.

«Qazaqstan – bizdiń atajurtymyz. Tilimiz, dinimiz, qanymyz bir baýyrlas halyqpyz. Qysyltaıańda qol ushyn sozý EDeA holdıngi retinde boryshymyz dep bilemiz. Múmkindigi bar azamattardy, onyń ishinde isker adamdardy osyndaı qoldaý kórsetýge shaqyramyn. Týystyń týystyǵy, aǵaıynnyń aǵaıyndyǵy qıyn kúnde bilinedi», - deıdi túrik kásipkeri Hýseıın Arslan.

Osy ýaqytta Qazaqstanda koronavırýs ınfektsııasyn juqtyrǵandar sany271-ge jetti.