Túrkııalyq BAQ Qazaqstannyń tólqujatyn «eń myqty» dep baǵalady

ASTANA. QazAqparat - Túrkııa radıo teledıdar agenttigi Qazaqstan men Qyrǵyzstannyń tólqujattary Ortalyq Azııada «eń myqty» dep tanyldy, dep habarlady.

Atalǵan aqparat kózi buny «Passport Index» agenttiginiń jarııalaǵan deregine súıene otyryp málimdegen.

«Vıza tańdaýy turǵysynan «Passport Index» agenttigi elderdiń tizimin jarııalady. Tizimde Qazaqstan men Qyrǵyzstannyń tólqujattary Ortalyq Azııada «eń myqty» dep tanyldy.

Agenttik tiziminde tólqujattyń «myqtylyǵy» vızasyz bara alatyn elder sanyna qaraı anyqtaldy.

Azamattary 71 elge vızasyz bara alatyn Qazaqstan atalmysh tizimde 56-shy kezekte. Qyrǵyzstan bolsa 58 elge vızasyz bara alady. Ol tizimde 68-shi kezekte. Tájikstan azamattary 54 el, Túrikmenstan azamattary 48 elge vızasyz bara alady.

Tizimde Germanııa men Sıngapýr birinshi orynda tur. Osy eldiń azamattary 158 elge vızasyz barady.

Aýǵanstan bolsa eń sońǵy orynda tur. Osy eldiń tólqujatyna ıe azamattar tek 24 elge vızasyz bara alady» dep jazady túrkııalyq trt.net.tr agenttigi.