Túrkııaǵa kómekke barǵan qutqarýshy: Eń úlken marapat – adamdardyń alǵysy

ASTANA. QazAqparat – Túrkııada bolǵan zilzalanyń saldaryn joıýǵa jumyldyrylǵan Tótenshe jaǵdaılar mınıstrliginiń 66 qyzmetkeri joǵary nagradamen marapattaldy. Onyń ishinde 8 maman Memleket basshysynyń Jarlyǵymen ІІ dárejeli «Aıbyn» jáne «Qurmet» ordenin ıelendi, dep habarlaıdy QazAqparat tilshisi.

Búgin keýdesine joǵary «Qurmet» ordenin taqqan Qaraǵandy qalasyndaǵy qutqarýshylar jedel otrıadynyń basshysy Rýslan Soıko Túrkııadaǵy qutqarý operatsııasyna toqtaldy.

«Biz óz jumysymyzdy atqardyq. Biz – qutqarýshymyz. Adamdardyń qaıǵysyn kóre tura árıne, muńaıasyń, janashyrlyq tanytasyń. Biz úshin eń úlken marapat – jumysymyzǵa alǵys aıtqan adamdardyń meıirimdi júzi men kózqarasy», - dep atap ótti Rýslan Soıko.

Onyń aıtýynsha, psıhologııalyq daıyndyqpen barǵan qazaqstandyq qutqarýshylar úshin jer silkinisi aımaǵyndaǵy jumys júıeli júrgizilgen.

Sonymen birge Prezıdenttiń tıisti Jarlyǵymen Aqmola oblystyq №1 mamandandyrylǵan órt sóndirý bóliminiń bastyǵy Aıdyn Jolamanov ІІ dárejeli «Aıbyn» ordenimen nagrattaldy.

«Úıindi astynda qalǵandardyń týystary bizdiń qasymyzda turyp, olardy aman shyǵyp qalar dep qatty úmittendi. Alaıda, ár qabattan máıitterdi shyǵaryp jatqanda olarǵa da, qutqarýshylarǵa da qıyn boldy. Jergilikti turǵyndar qazaqstandyq mamandarǵa óte jaqsy qoldaý kórsetip, alǵysyn aıtyp jatty», - dep bólisti Aıdyn Jolamanov.

Marapttaý rásiminen keıin BAQ ókilderiniń saýalyna jaýap bergen Tótenshe jaǵdaılar mınıstri ıÝrıı Ilın Túrkııadaǵy qutqarý operatsııasyna qatysqan qyzmetkerlerge aqshalaı syıaqy berilmeıtinin aıtty.