Túrkııadan Túrkistan oblysyna 1000 tonna joǵary sapaly maqta tuqymy jetkiziledi

ShYMKENT. QazAqparat- Túrik kásipkerleri qazaqstandyq fermerlerge tıimdi sharttarmen 1000 tonna joǵary sapaly maqta tuqymyn beredi. Bul ýaǵdalastyqqa «Qazaqstan Respýblıkasyndaǵy maqta sharýashylyǵyn damytý perspektıvalary» bıznes-forýmynda qol jetkizildi, dep habarlaıdy QazAqparat tilshisi.

Bıznes-forým jumysyna QR Aýyl sharýashylyǵy mınıstrliginiń ókilderi, túrik kásipkerleri, shıtti maqta óndirýshiler, maqta óńdeý zaýyttarynyń, ǵylymı uıymdardyń, maqta maıyn óndirý zaýyttarynyń ókilderi, sondaı-aq maqta tuqymyn óndirýshiler qatysty.

Onda Aýyl sharýashylyǵy vıtse-mınıstri Ábilqaıyr Tamabek maqta sharýashylyǵy salasyn damytýdyń mańyzdylyǵyn atap ótti.

«Memlekettik satyp alýlardaǵy qazaqstandyq qamtý úlesin, onyń ishinde turmystyq taýarlar men maqtany qaıta óńdeý ónimderin ulǵaıtý máselesi pysyqtalyp jatyr. Birinshi kezeńde ulttyq kompanııalar 70% deıin otandyq maqta ónimderin tósek-oryn, súlgiler jáne t.b. satyp alýy tıis. Memlekettik qorǵanys tapsyrysyn qalyptastyrý kezinde jergilikti qamtý úlesin 30%-dan 70%-ǵa deıin ulǵaıtý josparlanyp otyr», - dedi vıtse-mınıstr.

Forýmda Túrkııa Respýblıkasynan shaqyrylǵan «PROgen» kompanııasy otandyq ósimdik ósirýshilerge aýrýlar men zııankesterge tózimdi maqtanyń jańa sorttaryn tanystyrdy. Jańa sort bólip tóleý shartymen satylady. «Túrkistan» ÁKK tuqym satyp alýǵa qajetti qaryz somasyn jyl sońyna deıingi merzimde berýge daıyn.

Bıznes-forým qorytyndysy boıynsha Túrkııa Respýblıkasynyń Shyǵys Jerorta teńizi aýyl sharýashylyǵy zertteýler ınstıtýty men «Maqta sharýashylyǵy jáne baqsha sharýashylyǵy AShTS» JShS arasynda birlesken ǵylymı zertteýler júrgizý, maqtanyń jańa sorttaryn shyǵarý boıynsha yntymaqtastyq týraly kelisimge qol qoıyldy.