Túrkııadaǵy zilzala qurbandarynyń sany 30 myńǵa jýyqtady

ANKARA. QazAqparat – Túrkııadaǵy joıqyn tabıǵat apatynan kóz jumǵandar sany 30 myńǵa jýyqtady. Bul týraly eldiń Tótenshe jaǵdaılardyń aldyn alý jáne saldaryn joıý basqarmasy (AFAD) málim etti, dep habarlaıdy QazAqparat Anadolý agenttigine silteme jasap.

AFAD málimetteri boıynsha epıortalyǵy Kahramanmarashtaǵy Pazardjık jáne Elbıstan aýdandarynda bolǵan eki jer silkinisinen keıin 2 412 aftershok tirkelgen.

Joıqyn zilzala qurbandarynyń sany Túrkııa ýaqytymen saǵat 15:55-te 29 605 adamǵa jetti.

Eske salsaq, 6 aqpanda Túrkııada jeti baldan asatyn eki jer silkinisi boldy. Júzdegen aftershokpen jalǵasqan jerasty dúmpýi eldiń 10 provıntsııasynda, sondaı-aq kórshiles memleketterde de sezildi. Sonyń biri – Sırııa, ondaǵy qurbandar sany 3 574-ke jetti.

Aıta ketsek, Qazaqstan Tótenshe jaǵdaılar mınıstrliginiń qutqarýshylary da Túrkııada izdestirý-qutqarý jumystaryn júrgizip jatyr. Olar 7 adamdy qutqaryp, medıtsına qyzmetkerlerine tapsyrdy. Qaıtys bolǵan 19 adamnyń, onyń ishinde bir balanyń denesi úıindi astynan shyǵaryldy.

Qazaqstandyq qutqarýshylar komandasynyń quramyndaǵy TJM Respýblıkalyq jedel-qutqarý jasaǵynyń bas qutqarýshysy Birjan Baıqulov búgin qyzdy boldy.

Ókinishke qaraı, jer silkinisi qurbandarynyń arasynda qazaqstandyqtar da bar. QR SІM baspasóz qyzmeti taratqan málimetke saı, 7 aqpanda mınıstrliktiń jedel jelisine 4 dos jer silkinisinen keıin baılanysqa shyqpaı qalǵany týraly qońyraý túsken. Solardyń biri – Sabına Mamadıarova aman tabylyp, qolyna ota jasaldy. Al, Mırbolat (Mırýs) Qurmashev pen Ádil Qadyrbekovtiń deneleri tabylǵan edi, marqumdardyń máıitteri elge jetkizildi. Mırbolat Qurmashevti búgin Almatyda týǵan-týystary men dostary aqtyq saparǵa shyǵaryp saldy.

Qyrǵyzstan Respýblıkasy Syrtqy ister mınıstrliginiń baspasóz qyzmeti Túrkııada bolǵan jer silkinisinen qyrǵyz azamaty qaza tapqanyn málimdedi.

Sondaı-aq, Túrkııanyń keıbir aýdandarynda qutqarýshylar izdestirý jumysyn toqtatýǵa májbúr ekeni habarlandy.