Túrkııadaǵy zilzala: qazaqstandyq qutqarýshylardyń alǵashqy legi elge oralady
Búgin elimizden Túrkııaǵa kezekti arnaıy bort bardy. Qazir Gazıantep qalasynyń áýejaıynda júkterdi túsirý jumystary júrgizilip jatyr. Keıin kerek-jaraqtar zilzala saldarynan zardap shekken aımaqtarǵa jiberiledi.
Sonymen qosa, bul reıspen tótenshe jaǵdaı aýmaǵynan evakýatsııalanǵandar men qutqarýshylar tobynyń birinshi legi Qazaqstanǵa attanady.
Tótenshe jaǵdaılar birinshi vıtse-mınıstri Ibragım Kúlshimbaevtyń aıtýynsha, qazaqstandyq qutqarýshylar jumys istegen ýaqytta úıindi astynan 8 adam tiri qutqarylyp, qaza tapqan 80-nen astam jergilikti turǵynnyń denesi tabylǵan.
Apat aımaǵyndaǵy izdestirý-qutqarý jumystary kezinde Qazaqstannyń Túrkııadaǵy elshiliginiń qyzmetkerleri, sondaı-aq sol jaqta oqıtyn qazaqstandyq stýdentter de túrli mindetterge jumyldyrylǵan.
Túrkııa azamattary elimizdiń qutqarýshylaryna alǵys bildirýde. Al jergilikti atqarýshy organdar men qutqarý qurylymdarynyń qyzmetkerleri qazaqstandyq mamandardyń daıyndyǵy men kásibı sheberligin joǵary baǵalady.