Túrkııadaǵy zilzala: Qazaqstandyq qutqarýshylar úıindi astynan 85 adamnyń máıitin shyǵardy
Ondaǵy derekterge qaraǵanda, izdeý-qutqarý jumystary júrgizile bastaǵan kúnnen bastap Qazaqstan TJM qutqarýshylary 7 adamdy qutqaryp, medıtsına qyzmetkerlerine tapsyrdy. Qaıtys bolǵan 85 adamnyń, onyń ishinde 10 balanyń denesi úıindi astynan shyǵaryldy.
«Qazirgi ýaqytta Qazaqstan TJM qutqarýshylary eki eldi mekende izdeý-qutqarý jumystaryn jalǵastyrýda. Qıraǵan úılerdiń ornyndaǵy úıindilerdiń arasyn ashý jumystary júrgizilýde. Qutqarýshylar turaqsyz qurylymdardy bólshekteý jáne arnaıy keskishtiń kómegimen jol tazartý jáne qırandylardyń astynan zardap shekkenderdi izdeýdi jeńildetý úshin úıindilerdiń astyndaǵy armatýrany kesý jumystary júrgizýde. Bul beton, arqalyqtar jáne basqa da qurylys qaldyqtaryn bólshektep, arnaıy tehnıkaǵa júkteýdi jeńildetý úshin jasalady», - dep jazdy vedomstvodan.
Gazıantep qalasyndaǵy jumystar birinshi eshelonmen barǵan qutqarýshylar táýlik boıy eki aýysymda eki ýchaskede júrgizilýde. Qutqarýshylardyń bir toby toǵyz qabatty ǵımaratta jumys istep jatyr. Ǵımarat tolyǵymen qıraǵan. Úıindilerdiń arasynan adamdardy izdeý jumystary jalǵasýda. Bul jerde úıindilerdiń astynan 4 adam qutqaryldy, 27 qaza tapqan adamnyń denesi shyǵaryldy.
Qutqarýshylardyń basqa toby alty qabatty ǵımaratta jumys júrgizýde. Ǵımarat tolyǵymen qıraǵan. Úıindilerdiń arasynan adamdardy izdeý jalǵasý ústinde, qaıtys bolǵan 24 adamnyń denesi shyǵaryldy.
«Qazaqstann TJM ekinshi eshelonmen barǵan qutqarýshylar Túrkııaǵa kelgen sátten bastap Nýrdagy qalasynda izdeý-qutqarý jumystaryn táýlik boıy júrgizdi. Tolyǵymen qıraǵan ǵımaratta qazaqstandyq qutqarýshylar adamdardyń ornalasqan jeri men jaı-kúıin anyqtaý, úıindiler astynda zardap shekkendermen aýdıo baılanys ornatý, qajetti kómektiń kólemi men sıpatyn anyqtaý boıynsha jumystar istedi. Qazaqstandyq qutqarýshylardyń úlken tereńdiktegi úıindilerdiń astynan zardap shekkenderdi evakýatsııalaý úshin jol ashý jumystaryn oryndap, jedel jáne saýatty is-qımyldyń, sondaı-aq zardap shekkenderdi bloktan shyǵarý boıynsha ýaqtyly qabyldanǵan sharalardyń nátıjesinde kólemi 18 myń tekshe metrden astam úıindiniń astynan úsh tiri adamdy - er adam men eki áıeldi shyǵarýǵa múmkindik týdy. Adamdar dereý medıtsınalyq qyzmetterge jetkizildi. Qaıtys bolǵan 11 adamnyń denesi shyǵaryldy. Zardap shekken adamdardy izdeýge tehnıkalyq quraldar, úıindilerdi bólshekteýge ınjenerlik tehnıka paıdalanylýda. Úıindilerdiń arasynan adamdardy izdeý jumystary jalǵasady», - delingen TJM aqparatynda.
Qazaqstan TJM Apattar medıtsınasy ortalyǵynyń dárigerleri zardap shekken adamdarǵa táýlik boıy alǵashqy medıtsınalyq kómek kórsetýde. Kúnine orta eseppen 35-ten astam zardap shekken adam medıtsınalyq kómekke júginedi. Olardyń ishinde stresstiń jedel reaktsııasymen, tynys alý joldarynyń aýrýlarymen, sondaı-aq ártúrli jaraqattarmen baılanysty aýrýlar basym.