Túrkııadaǵy zilzala: Ekskavatorshy jigit óz ákesin 47 saǵattan soń qutqaryp aldy

ASTANA. QazAqparat – Túrkııanyń Kahramanmarash qalasynda úıindi astynda qalǵan qart adam 47 saǵattan keıin qutqaryldy, dep habarlaıdy QazAqparat Anadolý agenttigine silteme jasap.

Qutqarý operatsııasyna ekskavator mashınısi bolyp jumys isteıtin uly Osman Baıdemır de qatysqan.

Osman Baıdemırdiń ata-anasy turatyn segiz qabatty ǵımarat dúısenbi kúni 7,7 jáne 7,6 baldyq jer silkinisterinen qıraǵan. Er adam Býrsa qalasynyń qutqarýshylar brıgadasyna úıindilerdiń astynan daýys estigenin aıtty. Sodan keıin Aıdemır ekskavatordyń operatorlyq kreslosyna ózi otyryp, ákesin basyp qalǵan beton bloktaryn kóterýge kómektesken.

Qutqarý operatsııasy 14 saǵatqa sozylyp, 61 jastaǵy Salman Aıdemır aman qaldy. Al onyń áıeli, Osman Baıdemırdiń anasy zilzala saldarynan qaıtys bolǵan.

Aıta keteıik, Túrkııada zilzala qurbandarynyń sany 6,2 myńnan asty, taǵy 37 011 adam jaraqat aldy.

Búgin qazaqstandyq qutqarýshylardyń ekinshi eshelony Túrkııadaǵy joıqyn jer silkinisi bolǵan jerge attandy. Ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, qyzmettik ıtter bar.

Sonymen birge Túrkııada turatyn qazaqstandyqtar zardap shekkenderge 34 mln teńge jınap berdi.

Foto: aa.com.tr