Túrkııadaǵy jer silkinisinen qaza tapqandar sany 1651-ge jetti

ANKARA. TASS - QazAqparat - Túrkııanyń ońtústik-shyǵysynda bolǵan jer silkinisinen qaza tapqandar sany 1651-ge jetti, 11 myńnan astam adam jaraqat aldy. Bul týraly dúısenbi kúni jergilikti telearna efırinde respýblıkanyń densaýlyq saqtaý mınıstrliginiń basshysy Fahrettın Koja málimdedi, dep habarlaıdy QazAqparat TASS-qa silteme jasap.

«Qazirge deıin Kahramanmarashtaǵy jer silkinisi saldarynan 1651 adam qaza taýyp, 11119 adam jaraqat aldy. 3471 ǵımarat qıraǵan», - dedi ol.

Mınıstr birinshi jer silkinisinen beri oblysta 147 ret qaıtalanǵan jer silkinisi tirkelgenin atap ótti.

«10 provıntsııada aýyr shyǵyn tirkeldi», - dep qosty ol.

Kojanyń aıtýynsha, Iskenderýn qalasyndaǵy Hataı provıntsııasynda memlekettik aýrýhana qırap, qaladaǵy taǵy bir úlken aýrýhananyń ǵımaraty qatty zaqymdanǵan.

«Qıraǵan aýrýhananyń úıindileri astynda naýqastar men qyzmetkerler bar, qutqarý jumystary júrgizilýde», - dedi mınıstr. Medıtsınalyq mekemelerde oryn tapshylyǵyna baılanysty zardap shekkender basqa qalalarǵa emdelýge jiberilýde. Bul úshin, Koja aıtqandaı, avıatsııa belsendi túrde qoldanylyp jatyr.

Buǵan deıin habarlanǵandaı, Rejep Taıyp Erdoǵan jer silkinisine baılanysty Túrkııada jalpyulttyq aza tutý jarııalaǵan.

Túrkııanyń ońtústik-shyǵysyndaǵy Kahramanmarash provıntsııasynyń Pazardjık aımaǵynda magnıtýdasy 7,4 bolatyn jer silkinisi boldy. Jer silkinisiniń saldary Sırııada, tipti Grýzııada da sezilýde. Túrkııadaǵy jer silkinisi kezinde qaza tapqan jáne zardap shekken Qazaqstan azamattary joq. Memleket basshysy Qasym-Jomart Toqaev Túrkııa prezıdenti Rejep Taıyp Erdoǵanǵa eldiń ońtústik-shyǵysynda kóptegen qurban bolǵanyna baılanysty kóńil aıtty.

Baýyrlas halyqqa AMANAT partııalastary da kóńil aıtty. Qazaqstan da Túrkııaǵa shuǵyl kómek kórsetedi.