Túrkııadaǵy jer silkinisinde úıindi astynan qutqarylǵan sábı eki aıdan keıin anasymen qaýyshty

ANKARA. QazAqparat - Túrkııanyń ońtústiginde bolǵan alapat jer silkinisi kezinde úıindi astynan qutqarylǵan sábı arada 54 kún ótkende anasymen qaýyshty, dep habarlaıdy QazAqparat Anadoly agenttigine silteme jasap.

Dárigerler Gızem (jumbaq, tylsym degen maǵyna beredi) dep atap ketken úsh jarym aılyq Vetın Begdash 6 aqpanda Hataı provıntsııasynda bolǵan zilzaladan keıin 128 saǵat ótkende aman tabylǵan edi.

Sodan keıin ol birden aýrýhanaǵa jetkizilip, esh jerinde jaraqat joq, deni saý ekeni naqtylanǵan soń Ankaradaǵy aýrýhanaǵa aýystyrylǵan.

Otbasy jáne áleýmettik qyzmetter mınıstri Derıa ıAnyk sábıdi anasy ıAsemın Begdash emdelip jatqan Adana provıntsııasyna aparyp, ekeýin kezdestirdi.

Ana men balanyń qaýyshqan sáti óte áserli boldy.

Náreste men anasynyń bir-birine týys ekeni DNQ synamasy arqyly dáleldengen.

Vetın Begdashtyń ákesi men eki aǵasy 50 myńnan astam adamnyń ómirin qıǵan jer silkinisinen qaza tapty.

«Bul náreste shynymen ǵajaıyp. Onyń aman qalǵanyna jáne densaýlyǵynda eshbir kinárat joqtyǵyna kádimgideı tańyrqadyq jáne qýandyq. Bul rasymen de jumbaq. Gızem endi bizdiń de sábıimiz. Anany balasymen qaýyshtyrý – álemdegi eń asyl istiń biri. Osy qýanyshqa ortaq bolǵanymyzǵa shúkirlik etemin. Qudaı olarǵa uzaq ta baqytty ǵumyr bersin, endi bir-birinen eshqashan ajyramasyn», - degen mınıstr memlekettiń atalǵan otbasyna árqashan qoldaý kórsetetinin aıtty.