Túrkııadaǵy jer silkinisi: 2 qazaqstandyq bolýy múmkin úıindi arshylyp jatyr

ASTANA. QazAqparat – Túrkııada habarsyz ketken qazaqstandyqtar Mırýs Qurmashev pen Ádil Qadyrbekovty qutqarý qaıta jandandy. Úıindilerdi qazý úshin arnaıy kran jetkizildi, dep habarlaıdy QazAqparat tilshisi.

Bul týraly Astana Hub bas dırektory Maǵjan Mádıev Instagram jelisinde aıtty.

Buǵan deıin Maǵjan Mádıev Mırýs Qurmashev pen Ádil Qadyrbekovtyń lokatsııasy tabylǵanyn, olardyń úıindi astynda jabýy ábden múmkin ekenin jazǵan edi.

«Úıindi astynda tiri adamdar jatsa da, qazba jumystary baıaý júrip jatyr. Tehnıka, kran kerek, qutqarýdy tezdetetin adam kúshi kerek. Munda árbir mınýt mańyzdy», - dep jazdy M. Mádıev óziniń Telegram paraqshasynda.

Maǵjan Mádıev joǵalǵandardy izdeý úshin Hataı óńirine ózi barǵan.

Keshe olarmen birge bolǵan Sabına Mamadıarova men olardyń túrik dosy Kýbılaı Keskın tabylǵan edi. Sabınanyń qoly synǵan jáne aýrýhanaǵa jetkizildi.

Resmı derekke sáıkes, Túrkııadaǵy jer silkinisinen qaza bolǵandar sany 12,3 myńnan asty, 62 914 adam jaraqat aldy. Halyqty ornalastyrý úshin 70 818 shatyr tigilgen.

Qazaqstan qutqarýshylarynyń ekinshi toby Gazıantep qalasyna jetkizildi.

Bul ushaq qaıtar jolda Qazaqstan men Qyrǵyzstannyń 64 azamatyn evakýatsııalady.

Foto: instagram.com/madiyev