Túrkııadaǵy saılaý qalaı ótip jatyr

ANKARA. ANADOLY – QazAqparat – Túrkııada 28 mamyr, jeksenbide respýblıka tarıhynda alǵash ret prezıdent saılaýynda daýys berýdiń ekinshi týry ótip jatyr, dep habarlaıdy QazAqparat Anadolyǵa siltememen.

Saılaý ýchaskeleri saǵat 08:00-de ashylyp, jergilikti ýaqyt boıynsha 17:00-de jabylady.

Búkil el boıynsha 191 myńnan astam saılaý jáshigi ornatyldy. Saılaýshylar sany 60 mln adamnan asady.

Birinshi týrdyń qorytyndysy boıynsha 14 mamyrda úmitkerlerdiń eshbiri 50 protsent daýys jınaı almady, al ekinshi týrǵa «Halyq odaǵynan» eldiń qazirgi prezıdenti Rejep Taıyp Erdoǵan (49,52 protsent) men «Ulttar odaǵynan» kandıdat, Respýblıkalyq halyq partııasynyń kóshbasshysy Kemal Kylychdaroǵlý (44,88 protsent) ótti.

14 mamyrda saılaýda 5,17 protsent daýys jınaǵan «Alıans ATA» blogynyń kandıdaty Sınan Ogan jaqtastaryn ekinshi týrda Erdoǵannyń kandıdatýrasyn qoldaýǵa shaqyrdy.

Jergilikti ýaqyt boıynsha saǵat 17.00-de saılaý ýchaskeleri jabylǵannan keıin daýys sanaý bastalady.

Densaýlyq jaǵdaıy boıynsha saılaý ýchaskelerine kele almaıtyn saılaýshylar úshin «mobıldi jáshikter» jumys isteıtin bolady.

Sondaı-aq, 14 mamyrdaǵy saılaýdaǵydaı, kórý qabileti nashar azamattar arnaıy daıyndalǵan úlgi boıynsha daýys bere alady.

Shetelde turatyn Túrkııa azamattaryna daýys berý 24 mamyrda aıaqtaldy. 73 elde jáne BÓP-ta jalpy 3,5 mln saılaýshy daýys berdi.

Shetelden saılaý jáshikteri Ankaraǵa ushaqtarmen jáne dıplomatııalyq poshtamen jetkizildi. Olar jeksenbi kúni keshke daýys berý aıaqtalǵannan keıin basqa ýrnalarmen birge ashylady.

Saılaý qorytyndysy týraly habar taratýǵa tyıym salý 28 mamyr, jeksenbi kúni saǵat 21:00-ge deıin kúshinde bolady. OSK sheshimi boıynsha tyıym salý merzimi zańmen belgilengen ýaqyttan buryn alynyp tastalýy múmkin.