Túrkııadaǵy saılaý halyqaralyq talaptarǵa saı ótti - TúrkPA

ASTANA. QazAqparat - Túrki tildes elderdiń parlamenttik assambleıasy (TúrkPA) Halyqaralyq baqylaý mıssııasy Túrkııadaǵy prezıdent jáne parlament saılaýlaryna júrgizgen baqylaýdyń nátıjesi týraly baspasóz máslıhatyn ótkizdi, dep habarlaıdy QR Parlamenti Senatynyń baspasóz qyzmeti.

Ázerbaıjan Mıllı Medjlısiniń múshesi Ahlıman Amıraslanov mıssııa basshysy retinde ótinish usynyp, túrkııalyq BAQ ókilderine TúrkPA baqylaý baǵdarlamasy týraly aqparat berdi. Qazaqstandyq mıssııa ókilderi bolǵan senatorlar Narıman Tóreǵalıev, Bekmyrza Elamanov, Muhtar Jumaǵazıev, májilismen Nurlan Dýlatbekov, sondaı-aq qyrǵyzstandyq Maqsat Sabyrov pen Zakır Sharapov Túrkııadaǵy saılaý ahýaly jáne saılaý protsesi týraly óz kózqarastarymen bólisti.

Mıssııa ókilderi Ankaradaǵy 40-qa jýyq saılaý ýchaskesine baryp, úsh saılaý ýchaskesinde berilgen daýystardy eseptegen.

Baqylaýshylar saılaýǵa deıin Joǵarǵy saılaý keńesiniń tóraǵasy Sadı Gývenmen jáne saıası partııalardyń ókilderimen kezdesti. Kezdesý barysynda baqylaýshylarǵa saılaýǵa daıyndyq sharalary, sondaı-aq Túrkııanyń jetekshi saıası kúshteriniń saılaý platformalary men saıasaty týraly tolyq aqparat berildi.

Mıssııa saılaýdy basqarýda eshqandaı buzýshylyqtardy baıqamaǵandyqtaryn, sondaı-aq tıisti organdardyń resýrstarmen qamtamasyz etilgenin jáne saılaý ótkizýge kásibı daıyndalǵanyn atap ótti.

Mıssııa 2018 jyldyń 24 maýsymynda bolǵan Túrkııa Respýblıkasyndaǵy prezıdent jáne parlament saılaýlarynyń Túrkııa ulttyq zańnamasy men halyqaralyq saılaý talaptaryna saı ótkeni týraly qorytyndy jasady.