Túrkııada zilzaladan kóz jumǵandar sany 46 myńǵa jýyqtady

ANKARA. Anadoly - QazAqparat – Túrkııanyń Іshki ister mınıstri Súleıman Soılý Hataı provıntsııasyndaǵy óńirlik AFAD úılestirý ortalyǵynda málimdeme jasady, dep habarlaıdy QazAqparat Anadoly agenttigine silteme jasap.

«Qazirgi ýaqytta zilzaladan 45 968 adam qaza tapqany belgili boldy, olardyń 4 267-i Sırııa azamaty», dep málimdedi Túrkııa ІІM basshysy.

Sondaı-aq ol alǵashqy jer silkinisinen keıin 13 myńnan asa qaıta dúmpý tirkelgenin atap ótti.
«Jalpy 26 300 ǵımarat qırady. Olardyń 26 032-niń qıraǵan ornynda izdeý-qutqarý jumystary júrgizildi», - dedi ol.

Eske sala ketsek, 6 aqpanda Túrkııada magnıtýdasy 7,7 baldyq joıqyn jer silkinisi boldy. Epıtsentri Kahramanmarash provıntsııasyndaǵy Pazardjık aýdanynda bolǵan zilzala oshaǵy 7 shaqyrym tereńdikte bolǵan. Jer silkiný saldarynan Hataı, Gazıantep, Kılıs, Osmanıe, Malatıa, Adyıaman, Shanlyýrfa, Dııarbekır, Adana jáne Kahramanmarash provıntsııalarynda kóptegen ǵımarattar qırady.