Túrkııada zilzaladan 7 myńnan astam adam qaza tapty

ASTANA. QazAqparat – Túrkııadaǵy joıqyn jer silkinisinen qaza tapqandar sany 7108-ge jetti, 40 910 adam jaralandy, dep habarlaıdy QazAqparat tilshisi.

Túrkııa úkimeti janyndaǵy TJ saldaryn joıý basqarmasy (AFAD) jańa málimetterdi jarııalady.

Jer asty dúmpýleri Túrkııanyń Kahramanmarash, Gazıantep, Shanlyýrfa, Dııarbakyr, Adana, Adyıaman, Osmanııe, Hataı, Kılıs, Malatııa jáne Elazıg provıntsııalarynda adam shyǵyny men alapat qıraýǵa ákep soqty.

Atap aıtqanda, 5 775 turǵyn úı qıraǵan, apat aımaǵynyń turǵyndary úshin 50 818 shatyr ornatylǵan.

Іzdestirý-qutqarý jumystaryna 79 110 adam tartylǵan. Júk pen qutqarýshylardy jetkizýge, sondaı-aq zardap shekkenderdi tasymaldaýǵa 104 dana avıatsııalyq tehnıka jumyldyrylǵan.

Túrkııa prezıdenti Rejep Taıyp Erdoǵan joıqyn jer silkinisinen zardap shekken aýdandarǵa bara jatyr.

Aıta keteıik, Túrkııanyń ońtústik-shyǵysyndaǵy Kahramanmarash provıntsııasynda 5,1 baldyq jer silkinisi boldy. Onyń epıtsentri Geksýn aýdanynda 9 km tereńdikte bolǵan.

Búgin qazaqstandyq qutqarýshylardyń ekinshi eshelony Túrkııadaǵy joıqyn jer silkinisi bolǵan jerge attandy. Ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, qyzmettik ıtter bar.

Sonymen birge Túrkııada turatyn qazaqstandyqtar zardap shekkenderge 34 mln teńge jınap berdi.

Foto: aa.com.tr