Túrkııada zilzala saldarynan 4 adam mert bolyp, 120 turǵyn jaralandy

IZMIR. ANADOLY–QazAqparat – Izmır provıntsııasynda bolǵan jer silkinisi saldarynan 4 adam qaza tapty, taǵy 120-sy jaraqat aldy, dep habarlaıdy QazAqparat Anadoly agenttigine silteme jasap.

Buǵan deıin Túrkııadaǵy Izmır jaǵalaýynda 6,6 baldyq jer silkinisi bolǵany habarlanǵan.

Túrkııa úkimeti janyndaǵy Tótenshe jaǵdaılardyń aldyn alý jáne joıý basqarmasynyń (AFAD) habarlaýynsha, jerasty dúmpýi jergilikti ýaqytpen 14.51-de, Izmır provıntsııasy Seferhısar aýdanyndaǵy Egeı teńiziniń jaǵalaýynda tirkelgen.

Zilzala oshaǵy 16,5 shaqyrym tereńde bolǵan.

Jer dúmpýi 15 sekýndqa sozylyp, Túrkııanyń batysyndaǵy kóptegen provıntsııada sezilgen.

Túrkııa ІІM habarlaýynsha, zilzala saldarynan Izmır qalasynyń Bornova jáne Baırakly aýdandarynda alty turǵyn úı qırady.

Qazirgi málimet boıynsha jer silikinisinen Izmırde 4 adam mert bolyp, 120 turǵyn zardap shekken.

Túrkııa prezıdenti Rejep Taıyp Erdoǵan Izmırdegi zilzala saldarynan zardap shekken otandastaryna alańdaýly ekenin jetkizdi.

Qazaqstan Respýblıkasynyń Túrkııadaǵy elshisi Abzal Saparbekuly jer silkinisi bolǵan provıntsııadaǵy qazaqstandyqtar kómek qajet bolsa elshilikke habarlasýyn surady.