Túrkııada zilzala qurbandarynyń sany 5,4 myńnan asty

ASTANA. QazAqparat – Túrkııadaǵy eki joıqyn jer silkinisinen qaza tapqandar sany 5434-ke jetti, 31 777 adam jaraqat aldy, dep habarlaıdy QazAqparat Anadolý agenttigine silteme jasap.

Túrkııa úkimeti janyndaǵy tótenshe jaǵdaılardyń aldyn alý jáne joıý basqarmasy (AFAD) apat aımaǵyndaǵy sońǵy málimetterdi jarııalady.

Vedomstvonyń málimetinshe, tabıǵı apat saldarynan 5 775 ǵımarat qıraǵan.

Eske sala ketsek, dúısenbi, 6 aqpanda Túrkııanyń ońtústik-shyǵysynda magnıtýdasy jeti baldan asatyn eki jer silkinisi boldy (jergilikti ýaqyt boıynsha 04.17-de – 7,7 ball jáne 13.24-te-7,6 ball).

Prezıdent Rejep Taıyp Erdoǵan Túrkııada apat qurbandary úshin jeti kúndik Jalpyulttyq aza tutý týraly jarııalady.

Sondaı-aq, qazaqstandyq qutqarýshylar Gazıantep qalasynyń ortalyǵynda izdeý jumystaryn bastap ketken. Túrkııaǵa 41 adamnan turatyn top bardy, onyń ishinde respýblıkalyq jedel-qutqarý jasaǵynyń qutqarýshylarynan bólek, Apattar medıtsınasy ortalyǵynyń qyzmetkerleri de bar.