Túrkııada zilzala qurbandarynyń sany 3 myńǵa jetti

ANKARA. QazAqparat – Túrkııanyń ońtústiginde bolǵan zilzaladan qaza tapqandar sany 2921 adamǵa jetti. Bul týraly Túrkııa Tótenshe jaǵdaılar basqarmasynyń (AFAD) basshysy ıÝnýs Sezar málimdedi, dep habarlaıdy QazAqparat Anadolýǵa silteme jasap.

Onyń sózinshe, 15 834 adam jaraqat alǵan.
Túrkııa vıtse-prezıdenti Fýat Oktaı úıindi astynan 7840 adam aman shyǵarylǵanyn málim etti.
Sondaı-aq F.Oktaı 338 myń adam jataqhana, ýnıversıtet pen túrli ornalastyrý oryndaryna jaıǵastyrylǵanyn aıtty.
Prezıdent Rejep Taııp Erdoǵan Túrkııada jeti kúnge jalpyulttyq aza tutý kúnin jarııalady. El aýmaǵynda barlyq Memlekettik týlar túsirildi.
Túrkııanyń ońtústik-shyǵysynda bir táýlik ishinde magnıtýdasy jeti baldan joǵary eki jer silkinisi (jergilikti ýaqytpen 04:17-de – 7,7 ball, 13:24-te – 7,6 ball) boldy.
Túrkııa bıligi jerasty dúmpýiniń qaıtalanýynan qaýiptenip, turǵyndardan úılerine qaıtpaýdy surady.

Qazaqstan Prezıdenti Qasym-Jomart Toqaev Rejep Taııp Erdoǵanǵa kóńil aıtý jedelhatyn joldap, el Úkimetine Túrkııaǵa shuǵyl kómek kórsetýdi tapsyrdy.

Túrkııadaǵy jer silkinisinen kórshi Sırııa elinde de kóptegen ǵımarat qırap, qaza bolǵan halyq sany sońǵy málimet boıynsha 1 myńnan asty.