Túrkııada zilzala aýmaǵynda qalǵan qazaqstandyqtar qaıda habarlasa alady
«Qurmetti Qazaqstan azamattary! 2023 jyly 6 aqpanda Túrkııanyń ońtústik-shyǵys aýmaǵynda bolǵan jer silkinisine baılanysty, 7 aqpanda Gazıantep qalasyndaǵy Qazaqstan azamattaryn elge alyp ketý sharalary júrgizilýde. Osy rette Qazaqstanǵa qaıtamyn degen QR azamaty bolǵan jaǵdaıda, 7 aqpanda jergilikti saǵat 12:00-de Gazıantep qalasynyń áýejaıynda tıisti protsedýralardan ótip (pasport baqylaýy, qaýipsizdik tekserisi t.b.), daıyn bolýy tıis», - dep málimdeme jasady Ystanbuldaǵy Qazaqstan konsýldyǵy.
Sonymen qatar Qazaqstanǵa oralýǵa nıetti azamattardyń tizimin qurastyrý úshin mindetti túrde kórsetilgen nómirlerge habarlasý qajet: +90 538 880 70 41 (Konsýl Temirlan Saılaýuly), +90 312 491 91 00 (kezekshi komendant).
Aıta keteıik, Qazaqstannyń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy. Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.
Tıisti tapsyrmany Qazaqstan Prezıdenti Qasym-Jomart Toqaev berdi. Bort birinshi kezekte Gazıantep qalasyna barady.
Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.
Sońǵy derekterge sáıkes, Túrkııanyń Kahramanmarash provıntsııasynda zilzaladan kóz jumǵan adamdar sany 3381 adamǵa jetti, 20426 adam jaraqat aldy.