Túrkııada júrgen sportshylarymyzdy anyqtap jatyrmyz - Elsııar Qanaǵatov

ASTANA. QazAqparat - Qazir QR Mádenıet jáne sport mınıstrligi jáne Syrtqy ister mınıstrligi birlese otyryp, Túrkııada qazaqstandyq sportshylardyń bar-joǵyn, bar bolsa qaı qalalarynda júrgenin anyqtap jatyr.

Bul týraly QazAqparat tilshisine QR Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.

«Bul qaıǵyly oqıǵany biz de búgin estidik. Óte qıyn jaǵdaı. Qazir atys bolǵan qalada qazaqstandyq sportshylardyń bar joǵyn anyqtap jatyrmyz. Ulttyq shtattyq komandalar jáne sport rezervi dırektsııasy Túrkııaǵa ketken sportshylardyń tizimin jasaýda. Eger Túrkııada júrgen sportshylarymyz bolsa, quzyrly organdarmen birlese jumys istep, olardy elge qaıtarýǵa jumys isteımiz. Sondaı-aq, qandaıda bir jaǵdaı bolsa, habarlaıtyn bolamyz», dep atap ótti Elsııar Qanaǵatov.

Esterińizge sala keteıik, juma kúni bir top áskerı Túrkııada tóńkeris jasamaq bolǵan. Ankara men Ystambul kóshelerine áskerı tehnıka shyǵyp, atystar men jarylystar uıymdastyrǵan. Saldarynan eń kemi 60 adam qaza tapty.