Túrkııada jer silkinisinen zardap shekkenderge jańa úılerdiń kilti tabys etildi

ANKARA. QazAqparat – Prezıdent Rejep Taıyp Erdoǵan azamattarǵa Túrkııada apat aımaǵynda salynǵan jańa úılerdiń kiltin tabys etti, dep habarlaıdy QazAqparat Túrkııanyń Anadolu agenttigine silteme jasap.

Túrkııa prezıdenti Rejep Taıyp Erdoǵan Gazıantep provıntsııasynyń Nýrdagy aýdanynyń Belpynar aýylynda, Kahramanmarash provıntsııasynyń Mesthıýıýk jáne Túrkoǵly Ózbek aýyldarynda jeke úılerdiń kiltin tapsyrý rásimine qatysty.

Prezıdent saltanatty sharaǵa qatysýshylardy Ramazan merekesimen quttyqtady.

«6 aqpandaǵy joıqyn jer silkinisinen 15 kún ótken soń, jańa úılerdiń fýndamenti qalandy. Apat aımaǵynda barlyǵy 507 myń páter men 143 myń jeke úı salynady. Olardyń 319 myńy bıyl tapsyrylady. 60 myńǵa jýyq páterdiń fýndamenti qalandy. Bul jumystar úzdiksiz jalǵasýda. Bizdiń mindetimiz jer silkinisinen zardap shekken azamattardy múmkindiginshe tezirek jańa zamanaýı úılerge kóshirý», - dedi prezıdent.

Ol apat aımaǵyndaǵy barlyq qalalar men aýyldardyń ınfraqurylymy jańartylyp jatqanyn atap ótti. Bul baǵytta birneshe memlekettik baǵdarlama qabyldandy. Olardyń biri fermerlerdi paıyzsyz nesıelermen qamtamasyz etýge baǵyttalǵan.

Memleket basshysy Gazıantepte josparlanǵan 50 myń páterge qosymsha taǵy 50 myń páter salynatynyn aıtty.

Prezıdent Erdoǵan jańa úı ıelerine kiltterin tabystap, jer silkinisinen zardap shekken azamattardy barlyq baǵytta qoldaý kórsetiletinin aıtty.

Aıta keteıik, Túrkııada álsin-álsin jer silkinisi búgingi kúnge deıin tirkelip otyr.

Joıqyn eki zilzala 6 aqpanda Túrkııanyń Kahramanmarash provıntsııasynda boldy. Magnıtýdasy 7 baldan asty. Terbelis eldiń 10 provıntsııasynda, sondaı-aq kórshiles memleketterde, sonyń ishinde Sırııada sezildi. Osy tabıǵı apattan Túrkııaǵa kelgen shyǵyn 105 mlrd dollardan asty.

Túrkııada 6 aqpan – 31 naýryz aralyǵynda 22,5 myń jerasty dúmpýi tirkeldi.

Sońǵy resmı derekterge sáıkes, zilzala 50 096 adamnyń ómirin qıdy. 107 204 adam zardap shekti.