Túrkııada jer silkinisinen qaza tapqandar sany 17 myńnan asty

ASTANA. Anadoly-QazAqparat - Jańartylǵan málimetke sensek, Túrkııada jer silkinisinde sheıit bolǵandar sany 17 myńnan asqan, 72 myńǵa jýyq adam jaralandy, dep habarlaıdy QazAqparat Anadoly agenttigine silteme jasap.

Túrkııa tótenshe jaǵdaılar basqarmasynyń (AFAD) sońǵy málimeti boıynsha, Túrkııadaǵy jer silkinisi kezinde 17 406 adam kóz jumyp, 71 806 adam zardap shekken.

Buǵan deıin Túrkııadaǵy eki joıqyn jer silkinisinen zardap shekkenderdiń sany 16 546-ǵa jetip, 66 132 adam jaraqat alǵany habarlanǵan edi.

Aıta keteıik, Túrkııada jer silkinisine ushyraǵan provıntsııalardaǵy ǵımarattardy salǵan jáne qabyldap alǵan jaýapty adamdarǵa qatysty tergeý bastaldy. Bul jaıynda Túrkııanyń Ádilet mınıstri Bekır Bozdaǵ málimdedi.

AFAD deregine sáıkes, 6 aqpan kúni Túrkııanyń Kahramanmarash-Pazardjık aýdanynda 7,7 ball qýatymen jáne Elbıstanda 7,6 ball qýatymen jer silkingennen keıin 648 aftershok bolǵan.

Jerasty dúmpýi eldiń 10 provıntsııasynda, sondaı-aq kórshiles elderde, sonyń ishinde Sırııada sezildi.

8 aqpanda túrik elinde 5,4 magnıtýdasymen taǵy bir silkinis tirkeldi.

Eske salaıyq, Qazaqstan qutqarýshylary mingen bort 7 aqpan kúni Gazıantepke attanǵan bolatyn. Mamandarymyzdyń ekinshi toby Gazıantepke keshke keshqurym jetti.

Qazir Túrkııadaǵy jer silkinisi kezinde joǵalyp ketken qazaqstandyqtar izdestirilip jatyr. Onyń biri – Sabına Mamadıarova 8 aqpan kúni keshke aman-esen tabyldy.