Túrkııada jer silkinisinen qaza bolǵandar sany 85-ke jetti

IZMIR. ANADOLY –QazAqparat – Túrkııanyń Izmır qalasynda magnıtýdasy 6,6 baldyq jer silkinisinen ajal qushqandar sany 85-ke jetti. Bul týraly dúısenbi kúni Túrkııa úkimeti janyndaǵy Tótenshe jaǵdaılardyń aldyn alý jáne olardyń saldaryn joıý jónindegi basqarmadan (AFAD) málim etti. «QazAqparat» HAA bul týraly «Anadoly» agenttigine silteme jasap habarlaıdy.

Zardap shekken 962 adamnyń 743-i aýrýhanadan shyǵaryldy, 219 adam áli em alyp jatyr. Jansaqtaý bóliminde 9 azamat jatyr, tórteýiniń jaǵdaıy aýyr.

Opyrylyp túsken 8 turǵyn úıdiń qırandylary astynan izdeý-qutqarý jumystary jalǵasýda.

Jeksenbiden dúısenbige qaraǵan túni, jerasty dúmpýinen 58 saǵat ótkennen keıin úıindi astynan 14 jastaǵy qyz shyǵaryldy.

Úıindi astynan tabylǵan, jaraqat alǵan azamattar sany 105-ke jetti.

Túrkııanyń Egeı teńizi jaǵalaýyndaǵy alǵashqy zilzaladan keıin jalpy 1120 álsiz jerasty dúmpýi tirkelgen. 43 aftershoktyń magnıtýdasy 4 baldan asqan.

Túrkııa prezıdenti Rejep Taıyp Erdoǵan tabıǵat apatynyń saldaryn joıý úshin barlyq kúsh jumyldyrylǵanyn málimdedi. Ol úılerinen aıyrylǵan azamattardyń bári jańa páterge ıe bolatynyn atap ótti.

Eske sala ketsek, 29 qazanda Izmır provıntsııasyndaǵy Egeı teńizinde 6,6 ball qýatymen jer silkindi.

Buǵan deıin QR SІM Túrkııadaǵy qýatty jer silkinisinen zardap shekkender qatarynda qazaqstandyqtar joq ekenin habarlady. Túrkııadaǵy apatqa baılanysty Qazaqstan elshiligi elimiz azamattaryna arnalǵan telefon nómirlerin jarııalady.

Foto: Anadolu Agency, www.limkhub.com