Túrkııada jer silkinisi aımaǵynda qutqarý jumystary aıaqtaldy

IZMIR. Anadoly-QazAqparat – Túrkııanyń kólemi jaǵynan úshinshi orynda turǵan Izmır qalasynda bolǵan jer silkinisi saldarynan 114 adam qaza tapty, dep habarlaıdy QazAqparat Anadoly agenttigine silteme jasap.

Magnıtýdasy 6.6 jer silkinisi saldarynan opyrylyp qulaǵan turǵyn úılerdiń qırandylary ornynda izdeý-qutqarý jumystary aıaqtaldy.

Bul týraly sársenbi kúni Twitter paraqshasynda Túrkııa úkimeti janyndaǵy tótenshe jaǵdaılardyń aldyn alý jáne saldaryn joıý basqarmasynyń basshysy Mehmet Gıýllıýoǵly málim etti.

«Іzdeý-qutqarý komandalary jumysyn aıaqtady. Adamdardy qutqarýǵa úlesin qosqan árbir qutqarýshy men eriktige alǵys aıtamyz», -dep jazdy Gıýllıýoǵly.

Túrik bıliginiń málimetinshe, zilzala aımaǵynda zardap shekken 1035 adamnyń ishinde 898 adam aýrýhanadan shyǵaryldy, Izmırdiń taǵy 137 turǵyny em qabyldap jatyr.

30 qazanda bolǵan jer silkinisinen keıin Túrkııanyń batysynda 1713 aftershok tirkelgen, bul rette 45 oqıǵada jerasty dúmpýlerdiń magnıtýdasy 4 baldan joǵary bolǵan.