Túrkııada XX qysqy Sýrdlımpıada oıyndary bastaldy

<p>ALMATY. KAZINFORM &mdash; Túrkııanyń Erzýrým qalasynda XX qysqy Sýrdlımpıada oıyndary bastaldy. Dúbirli dodaǵa 36 memleketten 1000-ǵa jýyq sportshy qatysady.</p>

Jarysta taý shańǵysy, snoýbord, shańǵy jarysy, shahmat, fýtzal jáne kerlıng sport túrlerinen 34 komplekt medal oınatylady.

Qazaqstanan osy qysqy oıyndarǵa shahmat, snoýbord jáne shańǵy jarysynan 26 sportshy qatysady. 

Foto: Dene múmkindikteri shekteýli tulǵalarǵa arnalǵan sporttyq daıarlaý ortalyǵy

«Bıyl Qazaqstan Respýblıkasy qysqy Sýrdlımpıada oıyndaryna osymen úshinshi márte qatysqaly otyr. Sportshylarymyz jarystyń aldynda Şýchınsk jáne Almaty oblysynda oqý-jattyǵý jıyndarynan ótip, qysqy oıyndarǵa tyńǵylyqty daıyndyqpen keldi. Ulttyq qurama úshin alǵashqy saıys erten blıts shahmattan jáne shańǵy jarysynan bastalady. Sportshylarymyz atalmysh dodada laıyqty óner kórsetip, el qorjynyn Sýrdlımpıada oıyndarynyń medalimen tolyqtyrady dep senemin», - dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń dırektorynyń orynbasary Ómirzaqov Ádilhan Bolathanuly.

Sýrdlımpıada oıyndarynyń ashylý rásiminde elimizdiń týyn shahmattan álem chempıonatynyń qola júldegeri Sultan Qojahmetov ustap shyqty. 

Foto: Dene múmkindikteri shekteýli tulǵalarǵa arnalǵan sporttyq daıarlaý ortalyǵy

«Bul meniń alǵashqy Sýrdlımpıada oıyndarym. Osyndaı úlken jarysta elimizdiń týyn ustap shyǵý men úshin mártebe. Senim artqan Sport komıtetine, Dene múmkindikteri shekteýli tulǵalarǵa arnalǵan sporttyq daıarlaý ortalyǵyna, Ulttyq Sýrdlımpıada komıtetine jáne barlyq qazaqstandyqtarǵa alǵysymdy sózben emes, ispen dáleldeýge tyrysamyn», - dedi Sultan Qojahmetov.

Aıta keteıik, Sýrdlımpıada oıyndaryna estý qabileti zaqymdanǵan sportshylar qatysady. Jarys aldynda sportshylar aýdıogrammadan ótip, qoıylǵan talaptarǵa saı keletinin dáleldeý qajet. 

Foto: Dene múmkindikteri shekteýli tulǵalarǵa arnalǵan sporttyq daıarlaý ortalyǵy

Qysqy oıyndar 12 naýryzǵa deıin sozylady.