Túrkııada úıindi astynda qalǵan máıitterdiń kóptigi jan túrshiktirdi - aqmolalyq qutqarýshy
«Biz Túrkııaǵa jer silkinisinen eki kún ótkende ushyp bardyq. Gazıantep qalasynda qulaǵan 6 úıdiń ornynda, úıindi astynda 30-ǵa jýyq adam qalǵan ýchaskede jumys istedik. Ol jerde tiri qalǵandar bolǵan joq, barlyǵy qaza tapqan. Eń qıyny - úıindiniń astynda myjylyp qalǵan adamdardyń máıitin alyp shyǵý boldy. Ásirese, balalardyń máıitin kórgende júregiń qan jylaıdy. Jansyz dene bolsa da, biz olardy bútin kúıinde alyp shyǵýǵa tyrystyq. Óıtkeni, olardyń týystary qutqarý protsesin táýlik boıy bastan-aıaq baqylap otyrdy. Biz izdeýge qatysqan kezde qasymyzda eki uly, qyzy men anasynan aıyrylǵan er adam turdy. Ol týysqandarynyń denesin alyp shyqqanymyzdy asyǵa kútti. Keıin týystarynyń denesin bútindeı alyp shyqqanymyzda er adam eńirep jylap jiberdi, bizdi qushaqtap, alǵysyn aıtty», - dep eske alady qutqarýshy.
Tájirıbeli qutqarýshy bul salada birinshi jyl eńbek etip júrgen joq, moraldyq turǵydan daıyndyqtan ótken.
«Áriptesterim Túrkııaǵa bararda ońaı bolmaıtynyn bildi. Biz mamandandyrylǵan órt sóndirý bóliminde jumys isteımiz, qaza tapqandardyń denesin oqıǵa bolǵan jerden talaı ret alyp shyǵyp júrmiz. Túrkııadan bólek, ózimizde de bútin bir otbasy músheleriniń qaıtys bolǵanyn kórdik. Al bul joly zilzalada ólikterdiń kóptigi jan túrshiktirdi. Biraq qorqynysh bolǵan joq», - dep túıindedi Tilegen Temirbolatov.