Túrkııada Túrkistan oblysynyń kúnderi ótti

TÚRKІSTAN–YSTAMBUL. QazAqparat – Túrkistan oblysy ákimdiginiń uıymdastyrýymen Túrkııada «Ystambul qalasyndaǵy Túrkistan oblysynyń kúnderi» sharasy ótti. Jıynda kásipkerlerge, týrızm salasyndaǵy memlekettik organdarǵa jáne BAQ ókilderine Túrkistan oblysynyń týrıstik áleýeti tanystyryldy, dep habarlaıdy QazAqparat tilshisi.

Jıynda týrıstik salany damytýdyń ózekti máseleleri boıynsha pikiralmasý, týrıstik ónimderdi ázirleý jáne tasymaldaý boıynsha ózara is-qımyldyń tıimdi tetigin qalyptastyrý úshin B2B formatyndaǵy kezdesýler uıymdastyryldy. Shara qortyndysy boıynsha yntymaqtastyq týraly memorandýmdar túzildi.

Atap aıtqanda: Túrkistan oblysynyń týrızm basqarmasy men «TESIAD» Býrsa bıznesmender qaýymdastyǵy; «Turkistan Tourism Center» týrıstik aqparattyq ortalyǵy men «POYD» Qonaq úı dırektorlary qoǵamdastyǵy; «Turkistan Tourism Center» týrıstik aqparattyq ortalyǵy men «FCC Travels» týrıstik kompanııasy jáne «Turkistan Tourism Center» týrıstik aqparattyq ortalyǵy men «Vip Voyage» týrıstik agenttiginiń Ystambul qalasyndaǵy ókildigi arasynda Túrkistan oblysyna 1000-nan astam týrısterdi tartý boıynsha kelisimge qol qoıyldy.

Sondaı-aq, is-shara barysynda Túrkistan oblysy týrızm basqarmasynyń ókili men «Turkistan Tourism Center» týrıstik aqparattyq ortalyǵynyń basshysy Aqtanáli Ismaıl men túrkitildes memleketter Keńesiniń joba dırektory Ersın Aıdoganmen kezdesý ótti.

Kezdesý barysynda ekijaqty yntymaqtastyqty nyǵaıtý, týrızm salasyndaǵy seriktestik, túrkitildes memleketter Keńesiniń «Zamanaýı Jibek joly» biryńǵaı týrıstik marshrýtyn qalyptastyrý, qyzmet kórsetý sapasyn arttyrý máseleleri talqylandy.

Basqosý nátıjesi boıynsha túrkitildes memleketter Keńesi tarapynan Túrkistan oblysy týrıstik sala ókilderin oqytý boıynsha qoldaý kórsetýge kelisim jasaldy.