Túrkııada Túrki mádenıeti men tiliniń tazalyǵyn saqtaý joldary talqylandy

ANKARA. QazAqparat - Ankara qalasynda 22-27 mamyrda Túrki ulystarynyń «2017 Turk Dili Yili» YIII quryltaıy ótti. Sharanyń negizgi maqsaty - túbi bir túrki tilderiniń tarıhy men búgingi ahýalyn, túrki ulystaryna ortaq muralardyń tildik erekshelikteri men tilderdi damytýdaǵy rólin zerdeleý, dep habarlaıdy QazAqparat.

Quryltaıǵa 33 memleketten 250 ǵalym qatysyp, túrki ádebıeti men tiliniń ártúrli máselelerin qamtıtyn baıandamalar jasaldy. Budan bólek, qoǵamnyń órkendeýindegi tildiń mańyzy men onyń bolashaqtaǵy taǵdyry týraly sóz boldy. Sonymen qatar, jıynǵa qatysýshylar qazirgi jaHandaný dáýirinde túrki mádenıetiniń tereń tamyry men tiliniń derbestigin, tazalyǵyn saqtap qalýdyń joldary týraly pikirlerin ortaǵa saldy.

Túrki ulystarynyń quryltaıyna Túrkııa Prezıdenti Redjep Taıyp Erdoǵan qatysyp, alqaly jıynnyń mańyzy týraly sóz qozǵap, bolashaqtaǵy atqarylatyn isterge baǵyt-baǵdar bergen bolatyn.  Sóz sońynda Túrkııa Prezıdenti birqatar ǵalymǵa «Túrki tiliniń damýyna úles qosqany úshin» halyqaralyq marapatyn saltanatty túrde tabystady. Bul marapatty Túrkııa, Germanııa, Qazaqstan, Ońtústik Koreıa, Ázerbaıjan jáne Qyrǵyzstannan kelgen ǵalymdar aldy. Qazaqstannan osy marapatty fılologııa ǵylymdarynyń doktory, Abaı atyndaǵy Qazaq Ulttyq pedagogıkalyq ýnıversıtetiniń professory Gúlbaný Qosymova ıelendi. Onyń túrkologııa jáne tildiń tarıhy, sheshendik óner salasyndaǵy zertteýleri shet elderde, ásirese Túrkııadaǵy ǵylymı ortada keńinen tanymal.

Quryltaıǵa qatysýshylar túrki ǵalymdarynyń basyn qosqan sharany uıymdastyrǵany úshin Halyqaralyq lıngvıstıkalyq qoǵamǵa sheksiz rızashylyǵyn bildirdi.

 

Kenan Koch

 Fılologııa ǵylymdarynyń doktory, professor,

qazaq tiliniń sheteldegi zertteýshisi