Túrkııada taǵy bir tabıǵı apat: El endi sý tasqyny saldarymen kúresip jatyr

ASTANA. QazAqparat - Jaqynda ǵana joıqyn jer silkinisinen zardap shekken Túrkııada tabıǵat taǵy da tosyn minez tanytty. Eldiń ońtústik-shyǵysyndaǵy eki provıntsııasynda qatty jańbyr jaýyp, sel tasqyny júrip, saldarynan 14 adam kóz jumdy. Bul týraly tolyǵyraq QazAqparat sarapshysynyń materıalynda.

Osydan qyryq kún burynǵy zilzaladan esin jııa almaı jatqan Túrkııa halqy endi sý tasqynymen kúresip jatyr. 14 naýryzda Túrkııanyń ońtústik-shyǵysyndaǵy eki provıntsııada qatty jańbyr jaýyp, saldarynan sý tasqyny boldy. Sel aǵyny provıntsııanyń ákimshilik ortalyǵynyń birqatar kóshesi men dańǵylyn basyp qaldy.

Túrkııanyń Іshki ister mınıstri Súleıman Soılýdyń málimdeýinshe, Shanlyýrfa qalasynda sý tasqyny saldarynan 12 adam, Adııamanda 2 adam qaza taýyp, 5 adamdy izdeý jumystary júrgizilip jatyr.

Foto: Anadolý Agenttigi

«Qazirgi ýaqytta 163 adamnan turatyn 10 top 25 shaqyrymdyq jolaqta izdestirý-qutqarý jumystaryn júrgizýde, sonymen qatar súńgýirler de jumyldyrylǵan. Alaıda qolaısyz aýa raıy múmkindik bermeı jatyr. Іzdeý jumystaryn jalǵastyramyz. Sondaı-aq shyǵyndy anyqtaý jumystary da bastaldy», - dep málimdedi Túrkııanyń Іshki ister mınıstri Súleıman Soılý.

Ol óz sózinde azamattarǵa sý tasıtyn jerlerden aýlaq bolýdy eskertip, árkim óz jerinde bılik tarapynan jasalǵan eskertýlerge qulaq asýy kerek ekenin tilge tıek etti.

Foto: Anadolý Agenttigi

Tolassyz jaýǵan jańbyr saldarynan júzdegen úı men kólik sý astynda qaldy. Úılerin sý basqan Shanlyýrfa turǵyndary jataqhanalarǵa ornalastyryldy. Aýrýhanany sý basyp, mektepterde sabaq toqtaǵan.

Aıta keteıik, qaza bolǵandardyń basym kópshiligi – Shanlyýrfa turǵyndary. Sebebi munda jaýyn-shashyn táýliktik normadan eki ese kóp túsken. Onyń ústine bul óńirde aýyl sharýashylyǵy jaqsy damyǵan. Osy salaǵa tasqyn sýdan keletin shyǵyndy azaıtýǵa bar kúsh salynyp jatyr.

Foto: Anadolý Agenttigi

Provıntsııanyń órt sóndirý bóliminiń habarlaýynsha, Veısel Karanı kvartalyndaǵy ǵımarattardyń biriniń jertólesinde tabylǵan bes adam sırııalyqtar bolýy múmkin.

Sınoptıkterdiń sózinshe, aımaqta bir táýlik ishinde 100 mıllımetrden astam jaýyn túsken.Túrkııanyń memlekettik meteorologııalyq qyzmeti (TSMS) 14-20 naýryzǵa arnalǵan aýa raıy boljamyn jarııalap, birneshe kúshti jer silkinisinen zardap shekken ońtústik-shyǵys aımaq úshin qyzǵylt sary dabyl kodyn jarııalady.Jaýyn-shashyn mol bolýy múmkin mundaı qyzǵylt sary kodtalǵan provıntsııalar qatarynda Adııaman, Dııarbakyr, Elazyg, Malatııa, Kahramanmaras, Mardın, Sıvas, Shanlyýrfa jáne Kılıs oblystary bar.

Foto: Anadolý Agenttigi

Meteorologtardyń aıtýynsha, Adııaman jáne Shanlyýrfa provıntsııalaryndaǵy jaýyn-shashyn kem degende taǵy eki kúnge sozylady. Qazirgi tańda jaýyn-shashyn saldarynan syrtqa shyǵa almaı qalǵan turǵyndardy izdestirý jumystary áli de jalǵasyp jatyr.

Aıta keteıik, Túrkııanyń Ankara qalasynda búgin Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys sammıti ótip jatyr. Іs-shara jýyrda Túrkııanyń ońtústik jáne ońtústik-shyǵys aımaqtarynda bolǵan jer silkinisiniń saldaryn talqylap, uıymnyń tótenshe jaǵdaılar kezindegi kún tártibin belgileý úshin uıymdastyrylǵan. Jıyn barysynda Uıymnyń apat pen tótenshe jaǵdaılar menedjmenti jáne gýmanıtarlyq kómek salasyndaǵy qyzmetiniń basym baǵyttary, sonyń ishinde tabıǵı apattarǵa qarsy kúres jónindegi yntymaqtastyqty úılestirýge jáne nyǵaıtýǵa qatysty máseleler qarastyryldy. Aıta keteıik, Túrkııada jer silkinisinen qaza tapqandar sany 49 myńnan asqan.

Esterińizge sala keteıik, Túrkııada sońǵy ret sý tasqyny 2021 jyldyń tamyzynda Qara teńiz aımaǵynyń soltústik bóliginde bolǵan edi. Ol kezde de tolassyz jaýǵan jańbyr kóshkinge jáne ózenderdiń tasýyna ákelip, ınfraqurylymǵa, turǵyn úıler men kásiporyndarǵa úlken zııan keltirdi. Túrkııanyń Kastamona, Sınop, Bartın jáne Samsýn sııaqty birneshe provıntsııa zardap shekken bolatyn. Sý tasqyny saldarynan 82 adam qaza taýyp, ondaǵan adam jaraqat aldy. Myńdaǵan adam úılerinen evakýatsııalandy, al keıbir azamattar elektr qýatynsyz jáne taza sýǵa qol jetkize almaǵan edi. Sodan keıin Túrkııa úkimeti men áskerı qyzmetkerler, tótenshe jaǵdaılar qyzmetiniń kómegimen aýqymdy qutqarý jáne kómek kórsetý operatsııasyn oryndaǵan bolatyn.