Túrkııada shahta opyrylyp, jeti adam topyraq astynda qalyp qoıǵan

Túrkııanyń Zonǵuldak óńirindegi Erelı aýdanynda kómir óndiretin shahta opyryldy. Oqıǵa ornynda polıtsııa, qutqarýshylar jáne dárigerler jumys istep jatyr, dep habarlaıdy QazAqparat TRT Haber agenttigine silteme jasap.

Gýbernator Osman Hajybektashoglý TRT Haber arnasyna bergen málimetinde shahtada 280 adam bolǵanyn, onyń jeteýi zardap shekkenin málimdedi.

Altaýy aman qutqaryldy. Úıindi astynda qalǵan bir adam mert bolǵan.

Olardy qutqarýǵa 75 maman jumyldyryldy.

Keıin anyqtalǵany - tórt adam jumys istep jatqan aýmaqta shahtanyń tóbesi opyrylyp qalǵan. Opyrylǵan kómir emes. Jarylys ta bolmaǵan. Jaı oıyq.

Densaýlyq saqtaý mınıstri Fahrettın Qoja shahtadaǵy apattan zardap shekken 2 adam jáne aıaǵynan jaraqat alǵan bir adam em alǵan soń úıine shyqqanyn málimdedi.

Qalǵan 3 adamnyń emi jedel járdem bólmesinde jalǵasyp jatyr. Olardyń jaǵdaıy birqalypty.

TRT Haber qaza tapqan jáne jaraqat alǵan jumysshylardyń esimin jarııalady.

TTK Armutçuk kásipornyna qarasty shahtada jalpy 7 jumysshy japa shekken. Jumysshylardyń biri - 45 jastaǵy Ramazan Iyldyrym qaıtys boldy.

41 jastaǵy Koshkýn Atalaı, 49 jastaǵy Rıfat Óztúrk, 44 jastaǵy Ergún Ústún, 39 jastaǵy Ersin Aıdyn, 31 jastaǵy Serjan Hasan jáne 23 jastaǵy Talha Iylmaz jaralanǵan.