Túrkııada iri jol apatynan 10 adam qaza tapty
Búgin tańǵy 04:36 kezinde (Astana ýaqyty boıynsha 07:36) Tekeler aýdanyndaǵy «Sakarıa-Soltústik Marmara» tasjolynda 7 kólik ushyraǵan apat saldarynan 10 adam oqıǵa ornynda qaza taýyp, 59-y jaraqat aldy.
Onyń ishinde 8 adam aýyr halde jatyr.
Qaıtys bolǵandardyń kóbi joldyń júretin bóligine shyǵyp ketkendikten kóz jumdy. Olardy basqa kólikter qaǵyp ketken.
Oqıǵa ornyn aralaǵan aımaq gýbernatory ıA.Karadenız zardap shekkender ártúrli aýrýhanalarda emdelip jatqanyn aıtty.
Onyń ekeýi Qojaelidegi emdeý mekemelerine jiberilse, qalǵany Sakarııa provıntsııasynyń ortalyǵy men aýdandaryna jetkizilgen.
— Alǵashynda jeńil avtokólik júk kóligine soǵylǵan degen boljam bar. Sosyn oǵan basqa kólik quraldary kep soqtyǵysty, — dedi qala basshysy.
Túrkııanyń kólik jáne ınfraqurylym mınıstri A.Ýraloǵly oqıǵa ornyna jedel toptardyń shuǵyl jiberilgenin aıtty.
Magıstralda barlyq qajetti saqtyq sharalary jasalǵan.
Túrkııa densaýlyq saqtaý mınıstri Fahrettın Koja óz málimdemesinde zardap shekkenderdiń 30 jedel járdem kóligimen aýrýhanaǵa jetkizilgenin atap ótti.
Aldyn ala málimet boıynsha, jol apatyna úsh avtobýs, júk kóligi jáne taǵy úsh kólik qatysqan. Apatqa qalyń tuman sebep bolýy múmkin.
Túrkııanyń Ádilet mınıstri I.Týnch óz kezeginde apatty tergeýge 3 prokýror jumyldyrylǵanyn aıtty.
Aımaqtaǵy aýrýhanalarǵa áli de adamdar ákelinip jatyr. Zardap shekkender men qaza tapqandar arasynda basqa elden kelgen týrıster, sonyń ishinde qazaqstandyqtar bar-joǵy naqtylanbaǵan.
Kólikter joldan shyǵarylyp, tazalaý jumystary júrgizilgennen keıin kólik qozǵalysyna jabylǵan joldyń Ystanbul baǵyty bir jolaqtan baqylanatyn tártippen ashyldy.