Túrkııada Prezıdent pen Parlament saılaýynda daýys berý aıaqtaldy

ANKARA. ANADOLY. QazAqparat – Túrkııada búgin ótken Prezıdent pen Parlamenttiń 28-shi shaqyrylymynyń saılaýynda daýys berý aıaqtaldy. Daýys berý ýchaskelerinde bıýlletenderdi sanaý jumystary bastaldy, dep habarlaıdy QazAqparat Túrkııanyń Anadoly agenttigine silteme jasap.

Túrkııa Ortalyq saılaý komıssııasynyń tóraǵasy Ahmet Iener daýys berý barysynda keleńsizdikter bolmaǵanyn málimdedi.

Saılaý ýchaskeleri jergilikti ýaqyt boıynsha saǵat 8:00-de ashylyp, 17:00-de jabyldy. Elde daýys berý úshin 191 885 jáshik ornalastyrylǵan edi.

Túrkııada jáne shet memleketterde 64,1 mln saılaýshy daýys berdi. 4,9 mln adam alǵash ret daýys berdi. Saılaýshylar jeke basyn kýálandyratyn jalǵyz ǵana qujatpen daýys bere alatyn edi. Saılaýshylarǵa eki bıýlleten berildi, bireýi prezıdentke, ekinshisi parlament depýtattaryna daýys berý úshin.

Túrkııanyń Ortalyq saılaý komıssııasy aqpan aıynda bolǵan jer silkinisinen zardap shekken 11 provıntsııada daýys berý úshin barlyq qajetti sharalardy qoldandy.

Sheteldiń saılaý ýchaskelerinde 3,4 mln saılaýshy daýys bere alady. Olar úshin 73 memleket pen 156 sheteldik ókildikte saılaý komıssııalary jasaqtaldy. Túrkııanyń shetelderdegi ókildikterindegi daýys berý protsesi 9 mamyr kúni aıaqtaldy.

Túrkııadaǵy Prezıdent saılaýyna úsh kandıdat qatysyp jatyr. Olar is basyndaǵy prezıdent Rejep Taııp Erdoǵan, oppozıtsııalyq Halyq-respýblıkalyq partııasynyń lıderi Kemal Kylychdaroǵly jáne «Alıans ATA» blogynan kandıdat Sınan Ogan.

«Otan» partııasynyń tóraǵasy, Túrkııa prezıdenttigine kandıdat Mýharrem Indje óziniń kandıdatýrasyn alatynyn 11 mamyr kúni málim etti.

Saılaýǵa qatysý úshin 24 saıası partııa men 151 táýelsiz kandıdat tirkeldi.

Eger kandıdattardyń eshqaısysy daýystardyń basym bóligin jınaı almaıtyn bolsa, 28 mamyrda ekinshi týr ótedi.