Túrkııada orman órtenip, alty aýyl evakýatsııalandy

ANKARA. QazAqparat – Túrkııanyń soltústik-batysynda Chanakkale provıntsııasynda 11 saǵattan beri orman órtenip jatyr. 1 104 adam evakýatsııalandy, dep habarlaıdy QazAqparat Anadolu agenttigine silteme jasap.

Túrkııanyń aýyl jáne orman sharýashylyǵy mınıstri Ibragım ıÝmakly órtti ázirge baqylaýǵa alý múmkin bolmaı otyrǵanyn habarlady jáne bılik barlyq jaǵdaıǵa daıyndalyp jatyr. Qazir alty aýyl evakýatsııalandy, taǵy úsh aýyl evakýatsııaǵa daıyn. Órt 1500 gektardy sharpyǵan. 7 úı tolyq órtenip, 48 adam aýrýhanaǵa jatqyzyldy.

Túrkııa kólik jáne ınfraqurylym mınıstrligi orman órtine baılanysty Chanakkale-Kepez aýdanynda ońtústik-soltústik baǵytqa júzetin kemeler qozǵalysy ýaqytsha toqtatylǵanyn habarlady. Qozǵalys eki baǵyttan bir baǵytqa aınaldy.

«Órt teńiz jaǵalaýyn sharpyǵan jaǵdaıda Jaǵalaý qaýipsizdigi bas basqarmasynyń súıretkishteri kómek kórsetýge daıyn tur», - delingen mınıstrliktiń málimdemesinde.

Eske salaıyq, taıaýda Túrkııa ortalyǵynda Eskıshehır provıntsııasynda temperatýradan jańa rekord ornady: 49,5 gradýs. Buǵan deıingi rekord 2021 jyldyń 20 shildesinde Shırnak provıntsııasynda (49,1 gradýs) bolǵan edi.