Túrkııada oq tıip jaralanǵan qazaq jigiti aýrýhanadan shyqty

ASTANA. QazAqparat – Ystanbulda oq tıip jaralanǵan qazaq jigiti aýrýhanadan shyqty. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Kishkentaı búldirshindi emdetý úshin Túrkııaǵa barǵan Qazaqstan azamatyna oq tıgen bolatyn. Ol barǵan aýrýhanada oqty denesinen alýǵa 18 myń AQSh dollar somasynda esepshot qoıǵan. Bizdiń dılomattardyń aralasýymen bul operatsııa tegin jasaldy. Qazirgi kezde Qazaqstan azamaty aýrýhanadan shyqty», - dedi A. Smadııarov elordadaǵy baspasóz máslıhatynda tilshiler suraǵyna jaýap bere otyryp.

Onyń aıtýynsha, áleýmettik jelilerde jáne buqaralyq aqparat quraldarynda jarııalanǵan derekter boıynsha atalǵan azamattyń qyzyn emdeýge qarajat jınalyp jatyr. Ol rak aýrýyna shaldyqqan.

«Meniń bilýimshe, 200 myń AQSh dollaryna deıin qajet. Eki-úsh kúnniń ishinde sonyń jartysynyń jartysy jınalyp qaldy», - dedi resmı ókil.

Buǵan deıin Ystanbulda atys bolyp, Qazaqstan azamaty jaralanǵany habarlanǵan bolatyn.