Túrkııada nekege turǵan jastarǵa paıyzsyz nesıe beriledi

<p>ASTANA. KAZINFORM &mdash; Túrkııa prezıdenti Rejep Taıyp Erdoǵan 2025 jyldy &laquo;Otbasy jyly&raquo; dep jarııalap, birqatar bastama usyndy, dep habarlaıdy Kazinform <a href="https://www.inform.kz/ru/2025-y-god-obyavlen-v-turtsii-godom-semi-24323e" target="_blank" rel="noopener">menshikti tilshisi.</a></p>

Negizgi bastamalardyń biri — nekege turǵan jastarǵa paıyzsyz nesıeni engizý boldy. Nesıe somasy 150 000 Túrik lırasyn (shamamen 2,3 mln teńge) quraıdy. Ol 48 aıǵa beriledi. Bul rette nesıeni óteý merzimin eki jylǵa keıinge qaldyrý tetikteri de qarastyrylǵan. Bul usynys jas jubaılardyń qarjylyq aýyrtpalyǵyn azaıtyp, olardyń birge baqytty ómir súrýine septigin tıgizedi.

Foto: Anadolu ajansı

Sonymen qatar, jańa baǵdarlama aıasynda bala týǵanda beriletin járdemaqy mólsheri de ósedi:

• birinshi bala úshin ata-analar 5 000 lıra (shamamen 80 myń teńge) mólsherinde birjolǵy tólem alady;
• ekinshi bala úshin aı saıyn 1 500 lıra tólenedi (shamamen 23 myń teńge);
• úshinshi jáne árbir keıingi bala úshin otbasy aı saıyn 5 000 lıra alady (shamamen 80 myń teńge).

Prezıdent Erdoǵan bul sharalar otbasylardyń ál-aýqatyn jaqsartýǵa, jas ata-analardy qoldaýǵa jáne bala týý kórsetkishin arttyrýǵa baǵyttalǵanyn atap ótti.

— Myqty otbasy — bizdiń qoǵamnyń negizi. Jastar bolashaqqa senimmen qarap, otbasyn qurýǵa umtylatyndaı jaǵdaı jasaýǵa mindettimiz, — dedi ol.

Foto: Anadolu ajansı

Aıta keteıik, «2025 jyl — Otbasy jyly» baǵdarlamasy — Túrkııadaǵy demografııalyq jaǵdaıdy jaqsartýǵa baǵyttalǵan Úkimettiń jan-jaqty strategııasy sanalady. Bul sharalar qoǵamda qoldaýǵa ıe bolyp, túrli synǵa da tap boldy. Bastamany jaqtaýshylar onyń demografııalyq syn-qaterlerdi sheshýdegi mańyzdylyǵyn atap ótse, skeptıkter azamattardyń ómir súrý jaǵdaılaryn jaqsartý úshin tereńdetilgen ekonomıkalyq reformalardyń qajet ekenin alǵa tartady.

Osyǵan deıin Túrkııada eń tómengi zeınetaqy 15,75 paıyzǵa óskenin jazǵan edik.